குரலற்ற சமூகத்துக்கும் ஆதரவுக்கரமாக செயல்பட்டவர் கருணாநிதி - கனிமொழி எம்.பி.

பெரும்பான்மை மக்களுக்கு மட்டுமின்றி தொழுநோயாளிகள், மாற்றுத் திறனாளிகள், திருநங்கைகள் போன்ற குரலற்ற மக்கள் சமூகத்துக்கும் ஆதரவுக்கரமாக செயல்பட்டவர் கருணாநிதி என்று திமுக துணைத் தலைவரும், மக்களவை உறுப்பினருமான கனிமொழி புகழாரம் சூட்டினார்.

தமிழியக்கம், விஐடி பல்கலைக்கழகம், பாவேந்தர் பாரதிதாசன் தமிழ் மன்றம் சார்பில் கலைஞர் நூற்றாண்டு நிறைவு விழா வேலூர் விஐடி பல்கலைக்கழக அரங்கத்தில் திங்கள்கிழமை நடைபெற்றது. விழாவில் திமுக துணைத் தலைவரும், மக்களவை உறுப்பினருமான கனிமொழி நெகிழ்வுரையில் பேசியது:

இந்தியாவில் 4 இடங்களில் விஐடி பல்கலைக்கழக வளாகங்களை உருவாக்கியுள்ள கோ.விசுவநாதன், அடுத்த வளாகத்தை தூத்துக்குடியில் தொடங்க வேண்டும் என்றும் கேட்டுக் கொள்கிறேன். கருணாநிதி குறித்தும், அவரது அரசியல் பயணம், மக்கள் தொண்டு, எழுத்துத் திறன் குறித்துப் பேச பலரும் உண்டு. அவரது மகளாக எனக்கு அத்தனையுமாக இருந்தவர். அவருடன் இருக்கும் நேரங்கள் எப்போதும் மகிழ்ச்சி தரக்கூடியவை.

கருணாநிதி பார்க்காத வெற்றி, தோல்வி, அவமானம் கிடையாது. எதற்கும் அவர் தளர்ந்துவிடவில்லை. அவர் வாழ்நாள் மட்டுமின்றி அவர் மறைந்த பிறகும் போராடித்தான் வெற்றி கண்டார். அவரை இளைஞர்கள் முன்மாதிரியாக கொள்ள வேண்டும்.

கருணாநிதி தனது ஆட்சிக் காலத்தில் பொதுவிநியோகத் திட்டம், குடிசை மாற்று வாரியம், பெண்களுக்கு காவலர் பணி, பெண் கல்வியை ஊக்குவிக்க திருமண நிதியுதவி என எத்தனையோ முன்னோடி திட்டங்களை கொண்டு வந்தார். விவசாயிகளுக்கு இலவச மின்சார திட்டம் தந்து விவசாயத்தை பாதுகாத்தவர்.