மேற்குக் கரை: இஸ்ரேல் ராணுவ நடவடிக்கையில் 9 பேர் உயிரிழப்பு

ஆக்கிரமிக்கப்பட்ட மேற்குக் கரை பகுதியில் இஸ்ரேல் மேற்கொண்ட மிகப் பெரிய ராணுவ நடவடிக்கையில் ஒன்பது பேர் உயிரிழந்தனர்.

இது குறித்து பாலஸ்தீன சுகாதாரத் துறை அமைச்சகம் தெரிவித்துள்ளது:

மேற்குக் கரையின் வடக்கே இஸ்ரேல் ராணுவம் செவ்வாய்க்கிழமை இரவு முழுவதும் தாக்குதல் நடத்தியது. இதில் 9 பாலஸ்தீனர்கள் உயிரிழந்தனர்.

இது தவிர, ஜெனின் நகருக்குச் செல்லும் பாதையில் இஸ்ரேல் படையினர் தடை ஏற்படுத்தியுள்ளனர் என்று அமைச்சகம் தெரிவித்துள்ளது.

எனினும், பாலஸ்தீன் செஞ்சிலுவை சங்க செய்தித் தொடர்பாளர் ஒருவர், மேற்குக் கரை முழுவதும் இஸ்ரேல் ராணுவம் மேற்கொண்ட நடவடிக்கையில் 10 பேர் கொல்லப்பட்டதாக கூறினார். அவர்களில் இரண்டு பேர் ஜெனினிலும் நான்கு பேர் அருகிலுள்ள கிராமங்கள் வழியாக காரில் சென்று கொண்டிருந்தபோது இஸ்ரேல் தாக்குதலில் உயிரிழந்தனர். நான்கு பேர் அல்-ஃபரா அகதிகள் முகாமில் நடத்திய ராணுவ நடவடிக்கையின் போது கொல்லப்பட்டனர் என்று அவர் தெரிவித்தார்.