பெண் டிஎஸ்பி மீது தாக்குதல்: 7 பேர் கைது

இளைஞர் கொலை வழக்கில் தொடர்புடையவர்களை கைது செய்யக் கோரி, சாலை மறியலில் ஈடுபட முயன்றவர்களைத் தடுத்த போது, அருப்புக்கோட்டை பெண் காவல் துணை கண்காணிப்பாளரைத் தாக்கிய 7 பேரை போலீஸார் செவ்வாய்க்கிழமை கைது செய்தனர்.

அருப்புக்கோட்டையில்

ராமநாதபுரம் மாவட்டம், கமுதி அருகேயுள்ள பெருமாள்தேவன்பட்டியைச் சேர்ந்த கதிரேசன் மகன் காளிக்குமார் (28). இவர் சரக்கு வாகனத்தை ஓட்டிக் கொண்டு திருச்சுழி நோக்கி திங்கள்கிழமையன்று சென்று கொண்டிருந்தார். கேத்தநாயக்கன்பட்டி சந்திப்பு சாலையில் 2 இருசக்கர வாகனங்களில் வந்த 5 பேர், காளிக்குமார் வாகனத்தை வழிமறித்து அவரை அரிவாளால் வெட்டிவிட்டு தப்பிச் சென்றனர்.

இதில் பலத்த காயமடைந்த காளிக்குமார் அருப்புக்கோட்டை அரசு மருத்துவமனைக்கு கொண்டு செல்லும் வழியிலேயே உயிரிழந்தார். இதையடுத்து, அவரது உடல் கூறாய்வுக்காக அரசு மருத்துவமனை பிணவறையில் வைக்கப்பட்டது.

சாலை மறியல்-தாக்குதல்: இந்த கொலை வழக்கில் தொடர்புடையவர்களை கைது செய்ய வலியுறுத்தி, காளிக்குமாரின் உறவினர்கள், நண்பர்கள், பொதுமக்கள் அருப்புக்கோட்டை நகர் காவல் நிலையம் எதிரே செவ்வாய்க்கிழமையன்று சாலை மறியலில் ஈடுபட முயன்றனர்.

அப்போது, அங்கு பாதுகாப்புப் பணியில் ஈடுபட்டிருந்த காவல் துணைக் கண்காணிப்பாளர் காயத்ரி தலைமையிலான போலீஸார், அவர்களைத் தடுக்க முயன்றனர். இதில் போலீஸார், போராட்டக்காரர்கள் இடையே வாக்குவாதம் ஏற்பட்டது. அப்போது, பெண் டி.எஸ்.பி.உள்ளிட்ட போலீஸாரை, போராட்டக்காரர்கள் தாக்கினர்.