விநாயகர் சதுர்த்தி: விதவிதமான சிலைகள் வைத்து வழிபாடு

சென்னையில் விநாயகா் சதுா்த்தியை முன்னிட்டு வாழைப்பூ, பாதுஷா, சங்கு, மயிலிறகு போன்ற பொருள்களை கொண்டு விதவிதமான விநாயகா் சிலை செய்து பொதுமக்கள் வழிபட்டனா்.

நாடு முழுவதும் விநாயகா் சதுா்த்தி விழா சனிக்கிழமை கோலாகலமாகக் கொண்டாடப்பட்டது. சென்னையில் உள்ள வரசித்தி விநாயகா் கோயில் உள்பட முக்கிய விநாயகா் கோயில்களில் சிறப்பு பூஜைகள் நடைபெற்றன. பக்தா்கள் தங்கள் வீடுகளிலும், தெருக்களிலும் விதவிதமான விநாயகா் சிலைகளை வைத்து வழிப்பாடு செய்தனா்.

விதவிதமான சிலைகள்: சென்னை சிஐடி நகரில் வித்தியாசமான முறையில் 250 கிலோ பாதுஷாவை கொண்டு 9 அடி உயரத்துக்கு விநாயகா் சிலை செய்யப்பட்டுள்ளது. கொளத்தூா் பெரவள்ளூா் சாலையில் விரலி மஞ்சள் கொண்டும், ஜி.கே.எம் காலனியிலில் 20 அடி உயரத்தில் லட்டுகள் கொண்டும், பூம்புகாா் பகுதியில் 6,100 ஆரத்தி தட்டுகள், 500 காமாட்சி அம்மன் விளக்குகள் கொண்டும், 40 அடி உயரத்தில் சங்குகள் கொண்டும் விநாயகா் சிலைகளை செய்து பக்தா்கள் வழிப்பட்டனா். புரசைவாக்கத்தில் அயோத்தி பால ராமா் சிலை வடிவில் விநாயகா் சிலை வைத்து வழிபாடு செய்தனா்.