உக்ரைன் கோரிக்கை நிராகரிப்பு

தாங்கள் வழங்கியுள்ள ஏவுகணைகளைக் கொண்டு ரஷியாவின் தொலைதூரப் பகுதிகளில் தாக்குதல் நடத்த அனுமதிக்க வேண்டும் என்ற உக்ரைனின் கோரிக்கையை அமெரிக்காவும் பிரிட்டனும் நிராகரித்துள்ளன.

அமெரிக்க தலைநகர் வாஷிங்டனில் அந்த நாட்டு அதிபர் ஜோ பைடனைச் சந்தித்து பிரிட்டன் பிரதமர் கியெர் ஸ்டார்மர் நடத்திய பேச்சுவார்த்தையில் இது குறித்து எந்த அறிவிப்பும் வெளியிடப்படவில்லை.

இது குறித்து செய்தியாளர்களிடம் பிரதமர் ஸ்டார்மர் கூறியதாவது:

அமெரிக்க அதிபர் ஜோ பைடன் உடனான பேச்சுவார்த்தை ஆக்கபூர்வமாக இருந்தது.

பல்வேறு விவகாரங்களில் ஒட்டுமொத்த செயல்திட்டத்தை உருவாக்குவதை மையப்படுத்தியே எங்கள் பேச்சுவார்த்தை இருந்தது. குறிப்பிட்ட எந்த முடிவையும் எடுப்பதற்காக நாங்கள் பேசவில்லை என்றார் அவர்.

வெள்ளை மாளிகை வெளியிட்ட அறிக்கையில், உக்ரைன், காஸா போர் விவகாரங்கள் குறித்து பேச்சுவார்த்தை நடத்திய பைடனும் ஸ்டார்மரும், ரஷியாவுக்கு நாசகார ஆயுதங்களை ஈரான், வட கொரியா ஆகியவை வழங்குவது குறித்து ஆழ்ந்த கவலையைப் பரிமாறிக்கொண்டனர் என்று குறிப்பிடப்பட்டுள்ளது.