விரைவில் ராஜிநாமா: தில்லி முதல்வர் கேஜரிவால்

'முதல்வர் பதவியை அடுத்த இரண்டு நாள்களில் ராஜிநாமா செய்ய உள்ளேன்' என்று தில்லி முதல்வரும் ஆம் ஆத்மி கட்சியின் தேசிய ஒருங்கிணைப்பாளருமான அரவிந்த் கேஜரிவால் ஞாயிற்றுக்கிழமை அறிவித்தார்.

மேலும், 'தில்லி பேரவைத் தேர்தலை மகாராஷ்டிர மாநில தேர்தலுடன் சேர்த்து வரும் நவம்பர் மாதத்திலேயே நடத்த வேண்டும்' என்றும் அவர் வலியுறுத்தினார்.

தில்லி கலால் கொள்கை முறைகேடு வழக்கில் தில்லி முதல்வர் அரவிந்த் கேஜரிவாலுக்கு உச்சநீதிமன்றம் கடந்த வெள்ளிக்கிழமை ஜாமீன் வழங்கி உத்தரவிட்டது. இதையடுத்து, கடந்த சனிக்கிழமைகன்னாட் பிளேஸ் பகுதியில் உள்ள ஹனுமான் கோயிலுக்குச் சென்று வழிபாடு செய்த அவர், கட்சியின் மூத்த தலைவர்களுடன் தில்லியின் அரசியல் சூழல் மற்றும் ஹரியாணா சட்டப் பேரவைத் தேர்தல் தொடர்பாக ஆலோசனை மேற்கொண்டார்.