தில்லி புதிய முதல்வர் அதிஷி

தில்லி முதல் வர் பதவியில் இருந்து விலகும் கடிதத்தை துணைநிலை ஆளுநர் வி.கே. சக்ஸேனாவிடம் அரவிந்த் கேஜரிவால் செவ்வாய்க்கிழமை அளித்தார்.

இதையடுத்து, புதிய முதல்வராகத் தேர்வு செய்யப்பட்ட கல்வி அமைச்சர் அதிஷி ஆட்சிய மைக்க துணைநிலை ஆளுநரிடம் உரிமைகோரினார்.

முன்னதாக, செவ்வாய்க்கிழமை பிற்பகலில் ஆம் ஆத்மி கட்சி அலுவலகத்தில் கட்சியின் மூத்த நிர்வாகிகள் மற்றும் சட்டப்பேரவை உறுப்பினர்களுடன் அரவிந்த் கேஜரிவால் ஆலோசனை நடத்தினார். இந்தக் கூட்டத்தில் எடுக்கப்பட்ட முடிவின்படி துணைநிலை ஆளுநர் வி.கே. சக்ஸேனாவை மாலை 4.30 மணியளவில் ராஜ் நிவாஸில் கட்சியின் மூத்த நிர்வாகிகள், அமைச்சரவை சகாக்களுடன் அரவிந்த் கேஜரிவால் சந்தித்தார்.

துணைநிலை ஆளுநரிடம் ராஜிநாமா கடிதத்தை கேஜரிவால் வழங்கினார். இதையடுத்து, புதிய முதல்வராக அதிஷி பதவியேற்க ஏதுவாக அவரை கட்சியின் சட்டப்பேரவைக் குழுத் தலைவராகத் தேர்வு செய்துள்ளதாகவும் துணைநிலை ஆளுநரிடம் கேஜரிவால் தெரிவித்தார்.

இதுகுறித்து பின்னர் செய்தியாளர்களிடம் அதிஷியும், மூத்த அமைச்சர் கோபால் ராயும் விவரித்தனர். அதிஷி கூறுகையில், 'எனது தலைமையில் புதிய அரசு அமைக்க துணைநிலை ஆளுநரிடம் உரிமை கோரியுள்ளோம். தில்லி மக்களின் நலன்களைப் பாதுகாக்கும் வகையில் நான் கடமையாற்றுவேன்' என்றார்.

அமைச்சர் கோபால் ராய் கூறுகையில், 'புதிய முதல்வராக அதிஷியை பதவியேற்க அழைக்கும்படி துணைநிலை ஆளுநரை கேட்டுக் கொண்டோம். அவரை கட்சியின் சட்டப்பேரவைக் குழுத் தலைவராக தேர்வு செய்த முடிவை அவரிடம் தெரிவித்தோம். அதிஷி பதவியேற்கும் நாளை தீர்மானித்து விரைவாக தெரிவித்தால் இரண்டு கோடி தில்லி மக்களின் பணிகளை தொடர்ந்து செயல்படுத்த இயலும் என்று துணைநிலை ஆளுநரிடம் தெரிவித்தோம்' என்றார்.