மாலத்தீவுக்கு முதலில் உதவும் நாடு இந்தியா - பிரதமர் நரேந்திர மோடி

மாலத்தீவுக்கு முதலில் உதவிக்கரம் நீட்டும் நாடாக இந்தியா உள்ளது என்று பிரதமர் நரேந்திர மோடி தெரிவித்தார்.

தில்லியில் மாலத்தீவு அதிபர் முகமது மூயிஸுடன் திங்கள்கிழமை மேற்கொண்ட இருதரப்பு பேச்சுவார்த்தைக்கு பின்னர் பிரதமர் இவ்வாறு குறிப்பிட்டார்.

மாலத்தீவு அதிபர் முகமது மூயிஸ் 5 நாள் அரசுமுறைப் பயணமாக ஞாயிற்றுக்கிழமை இந்தியாவுக்கு வந்தார். கடந்த ஆண்டு நவம்பரில் அதிபராக பொறுப்பேற்ற பிறகு அவர் முதல்முறையாக இருதரப்பு அரசுமுறைப் பயணமாக இந்தியா வந்துள்ளார்.

தில்லியில் உள்ள குடியரசுத் தலைவர் மாளிகையில் முகமது மூயிஸுக்கு குடியரசுத் தலைவர் திரெளபதி முார்மு திங்கள்கிழமை வரவேற்பு அளித்தார். முப்படைகளின் அணிவகுப்பு மரியாதையும் அவருக்கு அளிக்கப்பட்டது.

இந்நிகழ்வில் பிரதமர் நரேந்திர மோடி பங்கேற்றார். இதைத் தொடர்ந்து, தில்லியில் உள்ள ஹைதராபாத் இல்லத்தில் பிரதமர் மோடி மற்றும் அதிபர் மூயிஸ் இடையே இருதரப்பு பேச்சுவார்த்தை நடைபெற்றது.

நிதி நெருக்கடியில் மாலத்தீவு: சீன ஆதரவு நிலைப்பாடு கொண்டவராக அறியப்படும் மூயிஸ், அதிபரான உடன், மருத்துவச் சேவைக்கான ஹெலிகாப்டர்களை இயக்கிவந்த இந்திய ராணுவ வீரர்கள் வெளியேற வேண்டும் என மூயிஸ் உத்தரவிட்டார். இதனால் இந்தியா-மாலத்தீவு நல்லுறவில் விரிசல் ஏற்பட்டது.

சமீப காலமாக மாலத்தீவு நிதி ரீதியில் பல்வேறு சவால்களை எதிர்கொண்டு வருகிறது. அந்நாட்டின் அந்நிய செலாவணி கையிருப்பு குறைந்துள்ள நிலையில், இந்தியாவுடனும் அதிபர் மூயிஸ் நட்பு பாராட்டி வருகிறார்.

கடந்த ஜூன் மாதம் நடைபெற்ற பிரதமர் மோடியின் பதவியேற்பு நிகழ்ச்சியில் அவர் நேரில் பங்கேற்றார். அண்மையில், ஐ.நா. மாநாட்டில் பங்கேற்க அமெரிக்கா சென்ற முகமது மூயிஸ், ‘இந்தியாவுக்கு எதிரான கொள்கையை கடைப்பிடிக்கவில்லை’ என்று தெரிவித்தார். இந்தச் சூழலில், அவரது இந்திய வருகையும் பிரதமர் மோடி உடனான சந்திப்பும் முக்கியத்துவம் பெற்றது.