திருப்பூரில் நாட்டு வெடி வெடித்து குழந்தை உள்பட 3 பேர் உயிரிழப்பு

திருப்பூரில் வீட்டில் தயாரித்த நாட்டு வெடி வெடித்ததில் 9 மாத குழந்தை உள்பட 3 பேர் செவ்வாய்க்கிழமை உயிரிழந்தனர்.

மேலும், 6 குழந்தைகள் உள்பட 14 பேர் காயமடைந்தனர்.

நகர் திருப்பூர், பாண்டியன் பொன்னம்மாள் வீதியைச் சேர்ந்தவர் கார்த்திக் (32), இவரின் மனைவி சத்தியபிரியா (29). இவர்களுக்கு சொந்தமான வீடுகளில் பலர் குடியிருந்து வருகின்றனர். இந்நிலையில், கார்த்திக் வீட்டில் செவ்வாய்க்கிழமை காலை பலத்த வெடிசப்தம் கேட்டது. இதனால் அந்தப் பகுதியில் நில அதிர்வு ஏற்பட்டதுடன், கரும்புகையும் கிளம்பியது.

இதுகுறித்து அக்கம்பக்கத்தினர் திருமுருகன்பூண்டி காவல்துறையினருக்கும், திருப்பூர் வடக்கு தீயணைப்புத்துறையினருக்கும் தகவல் அளித்தனர். முன்னதாக, அருகில் இருந்த வீடுகள் சேதமடைந்ததுடன், நாட்டு வெடிகுண்டு வெடித்த தகவல் பரவியதைத் தொடர்ந்து பொதுமக்களும் அப்பகுதியில் அதிக அளவில் திரண்டனர். இதற்கிடையே, சம்பவ இடத்துக்கு விரைந்த தீயணைப்புத்துறையினரும், காவல்துறையினரும் மீட்புப் பணியில் ஈடுபட்டனர்.