ஹரியாணாவில் ‘இவிஎம்' குளறுபடி விசாரணை கோரி தேர்தல் ஆணையத்தில் காங்கிரஸ் புகார்

ஹரியாணா சட்டப்பேரவைத் தேர்தல் வாக்கு எண்ணிக்கையில் சில மின்னணு வாக்குப்பதிவு இயந்திரங்களில் (இவிஎம்) குளறுபடி கண்டறியப்பட்டது குறித்து விசாரணை நடத்த தேர்தல் ஆணையத்திடம் காங்கிரஸ் புகார் மனு அளித்துள்ளது.

செவ்வாய்க்கிழமை நடைபெற்ற ஹரியாணா தேர்தல் வாக்கு எண்ணிக்கையின் முதல் ஒரு மணி நேரம் காங்கிரஸ் பெரும்பாலான தொகுதிகளில் முன்னிலை வகித்தது. பின்னர் காங்கிரஸை பின்னுக்குத் தள்ளி பாஜக பெரும்பான்மை பலத்துடன் மீண்டும் ஆட்சியைத் தக்கவைத்தது.

இத்தோல்வி எதிர்பாராதது மற்றும் ஏற்றுக்கொள்ள முடியாதது என்று காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் உள்ளிட்டோர் கூறினர்.