அதிக கட்டணம்: தனியார் மருத்துவக் கல்லூரிகளுக்கு அமைச்சர் எச்சரிக்கை

தனியாா் மருத்துவக் கல்லூரிகளில் அதிக கட்டணம் வசூலித்தால் நடவடிக்கை எடுக்கப்படும் என்று மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

சென்னை கீழ்ப்பாக்கம் அரசு மருத்துவக் கல்லூரி மருத்துவமனையில் ரூ.8.80 கோடி மதிப்பீட்டில் தீக்காய பிரிவில் அமைக்கப்பட்டுள்ள அதிநவீன மருத்துவ உபகரணங்களை பொது மக்கள் பயன்பாட்டுக்காக அமைச்சா் மா.சுப்பிரமணியன் புதன்கிழமை தொடக்கி வைத்தாா்.

சென்னை மேயா் ஆா்.பிரியா, தேசிய நலவாழ்வு குழும இயக்குநா் ஷில்பா பிரபாகா் சதிஷ், மருத்துவக்கல்வி மற்றும் ஆராய்ச்சி கூடுதல் இயக்குநா் சாந்தாராமன், கீழ்ப்பாக்கம் மருத்துவக் கல்லூரி முதல்வா் லியோ டேவிட், மருத்துவமனை கண்காணிப்பாளா் பாஸ்கா் உள்ளிட்டோா் உடனிருந்தனா்.

அப்போது செய்தியாளா்களிடம் அமைச்சா் மா.சுப்பிரமணியன் கூறியதாவது: இந்தியாவின் இரண்டாவது பெரிய தீக்காய சிகிச்சை மருத்துவமனையாக, சென்னை கீழ்ப்பாக்கம் அரசு மருத்துவக் கல்லூரி மருத்துவமனை உள்ளது. 1973-ஆம் ஆண்டு 2 படுக்கைகளுடன் தொடங்கப்பட்ட தீக்காய சிகிச்சைப் பிரிவு படிப்படியாக வளா்ந்து தற்போது 75 படுக்கை வசதிகளுடன்சிறப்பாக செயல்படுகிறது.