அஸ்ஸாம் குடியுரிமை சட்டப் பிரிவு செல்லும்

அஸ்ஸாம் மாநிலத்தில் கடந்த 1966-ஆம் ஆண்டு ஜனவரி 1-ஆம் தேதி முதல் 1971-ஆம் ஆண்டு மார்ச் 25-ஆம் தேதி வரை சட்டவிரோதமாக புலம் பெயர்ந்தவர்களுக்கு இந்திய குடியுரிமை வழங்க வகை செய்யும் குடியுரிமைச் சட்டத்தின் பிரிவு 6ஏ செல்லும்' என்று உச்சநீதிமன்ற அரசியல் சாசன அமர்வு வியாழக்கிழமை தீர்ப்பளித்தது.

இதன்மூலம், 1971-ஆம் ஆண்டு மார்ச் 25-ஆம் தேதிக்கு முன்பாக அஸ்ஸாம் மாநிலத்துக்குப் புலம் பெயர்ந்து குடியிருந்து வருபவர்கள் இந்திய குடியுரிமையைப் பெற முடியும் என்பதை உச்சநீதிமன்றம் உறுதி செய்துள்ளது. அஸ்ஸாமுக்கு சட்டவிரோதமாக புலம் பெயர்ந்தவர்களில் பெரும்பாலானோர் வங்கதேசத்தைச் சேர்ந்தவர்களாவர்.

1971-ஆம் ஆண்டு இந்தியா-பாகிஸ்தான் போரின்போது, வங்கதேசத்திலிருந்து வெளியேறிய மக்கள் அஸ்ஸாம் உள்ளிட்ட வடகிழக்கு மாநிலங்களில் தஞ்சமடைந்தனர். இதன் காரணமாக, அஸ்ஸாம் மாநிலத்தில் பல்வேறு வன்முறை சம்பவங்கள் நிகழ்ந்தன. அதைத் தொடர்ந்து, வெளிநாட்டினரை அடையாளம் கண்டு அவர்களுடைய நாட்டுக்குத் திருப்பி அனுப்புவது தொடர்பாக அப்போதைய பிரதமர் ராஜீவ் காந்தி தலைமையிலான மத்திய அரசு 1985-ஆம் ஆண்டில் அஸ்ஸாம் மாணவர்கள் சங்கத்துடன் ‘அஸ்ஸாம் ஒப்பந்தம்' என்ற உடன்பாட்டை மேற்கொண்டது.