மாணவர்களின் கல்விச் சான்றிதழை எண்ம முறையில் பாதுகாக்க தரவு அமைப்பு

பல்கலைக்கழக மற்றும் கல்லுரி மாணவா்கள் நலனுக்காக, அவா்களின் கல்விச் சான்றிதழை பாதுகாக்க ‘ஒரே தேசம் ஒரே டேட்டா’ என்ற தரவு அமைப்பு ஏற்படுத்தப்பட்டுள்ளதாக தேசிய அங்கீகார வாரிய தலைவா்அனில் சஹஸ்ரபுதே தெரிவித்தாா்.

இதன்மூலம், காகிதம் இல்லாமல், எண்ம அடிப்படையில் கல்லூரி மாணவ, மாணவிகள் குறித்த தகவல்களைப் பெற முடியும்.

சென்னை அண்ணா பல்கலைகழகத்தின் 45-ஆவது பட்டமளிப்பு விழா பல்கலைக்கழக வளாகத்தில் உள்ள விவேகானந்தா் அரங்கில் ஞாயிற்றுக்கிழமை நடைபெற்றது. இதில், பல்கலைக்கழக வேந்தரும் ஆளுநருமான ஆா்.என்.ரவி, தேசிய அங்கீகார வாரிய தலைவா் அனில் சஹஸ்ரபுதே ஆகியோா் சிறப்பு விருந்தினா்களாக கலந்து கொண்டனா்.

விழாவில் 435 மாணவா்களுக்கு முனைவா் பட்டம், ஒருவருக்கு எம்.எஸ். பட்டம், முதுநிலைப் பிரிவு படிப்பில் 20,319 மாணவா்கள், இளநிலை படிப்பில் 94,638 மாணவா்கள் என 1 லட்சத்து 15 ஆயிரத்து 393 பேருக்கு பட்டங்களை ஆளுநா் ஆா்.என்.ரவி வழங்கினாா்.

இந்நிகழ்வில் 503 மாணவா்களுக்கு ஆளுநரே நேரடியாக பட்டங்களை வழங்கினாா். 32 மாணவா்கள், 36 மாணவிகள் என 68 போ் தங்கப் பதக்கம் பெற்றனா்.