20 கி.மீ. தொலைவுக்கு அணிவகுத்து நின்ற வாகனங்கள்

தமிழக வெற்றிக் கழக மாநாட்டுக்கு வந்த வாகனங்களால் திருச்சி - சென்னை தேசிய நெடுஞ்சாலையில் சுமார் 20 கி.மீ. தொலைவுக்கு சாலையின் இருபுறங்களிலும் வாகனங்கள் அணிவகுத்து நின்றன.

தமிழக மாநாடு விழுப்புரம் மாவட்டம், விக்கிரவாண்டி அருகே வி.சாலையில் ஞாயிற்றுக்கிழமை மாலையில் நடைபெறுவதாக அறிவிக்கப்பட்டாலும், அதிகாலை முதலே மாநாட்டுக்கு தொண்டர்கள் வாகனங்களில் வரத் தொடங்கினர்.

காலை 9 மணிக்கு மேல் திருச்சி - சென்னை தேசிய நெடுஞ்சாலையில் மாநாட்டுக்கு வரும் வாகனங்கள் எண்ணிக்கை அதிகரிக்கத் தொடங்கியது. குறிப்பாக, விழுப்புரத்தில் (புறவழிச்சாலை)தொடங்கிய போக்குவரத்து நெரிசல் 20 கி.மீ. தொலைவுக்கு மேல் அதிகரித்து காணப்பட்டது.

விழுப்புரம்-சென்னை, சென்னை - விழுப்புரம் சாலைகளில் இரு வழிகளிலும் நீண்ட தொலைவுக்கு வாகனங்கள் அணிவகுத்து நின்றன.

சென்னை-திருச்சி தேசிய நெடுஞ்சாலையில் போக்குவரத்து நெரிசல் ஏற்பட்டது.

தொண்டர்கள் வந்து செல்வதற்காக, தேசிய நெடுஞ்சாலையின் இரு பக்கங்களிலும் இரும்பினாலான தடுப்புகள் அமைக்கப்பட்டன. இதன் வழியாக தொண்டர்கள் மாநாட்டுத் திடலுக்குள் சென்றனர்.