நல்லதோர் வீணை நலங்கெடலாகாது

சமீபத்தில் சென்னை கல்லூரி மாணவர்களிடையே ‘ரூட் தல’ யார் என்ற மோதலின் விளைவாக ஒரு மாணவர் உயிரிழந்துள்ளார்.

- நாகை பாலா

அவரது உயிரிழப்பு அவரது குடும்பத்திற்கு மட்டுமின்றி சமூகத்திற்கும் ஒரு பேரிழப்பாகும். மாணவர் தேர்வு மற்றும் விளையாட்டுப் போட்டிகளால் மோதல்கள் நிகழ்வது பல காலமாக உள்ளது. அது தற்போது ஒரு கொலையில் போய் முடித்திருப்பது மிகவும் வருத்தத்திற்குரியது.

விடுதி மாணவர்களைத் தவிர கல்லூரிக்கு தினசரி வந்துசெல்லும் மாணவர்கள் பொது போக்குவரத்தான பேருந்து மற்றும் தொடர் வண்டியைத் தேர்ந்தெடுக்கின்றனர். கல்லூரி வளாகத்துக்குள் நடைபெறும் பிரச்னைகளுக்கு வேண்டுமானால் கல்லூரி நிர்வாகம் பொறுப்பேற்கலாம். பேருந்து மற்றும் தொடர் வண்டிகளில் ஏற்படும் மாணவர் மோதல்களைக் கட்டுப்படுத்த முடியாததால்கல்லூரிகளுக்கு கெட்ட பெயர் ஏற்படும் சூழல் உருவாகிறது.

குறிப்பிட்ட நேரத்தில் கல்லூரிக்கு பொதுப் பயணத்தை மேற்கொள்ளும் மாணவர்களில் யார் வலிமையானவர் அல்லது யார் தலைவர் என்பதன் கல்லூரி மொழியே ‘ரூட் தல’ என்பதாகும். பொதுமக்கள் யாரும் அங்கீகரிக்காத இந்தப் பதவியால் பிற்காலத்தில் அவர்களுக்கு எந்த பயனும் வரப்போவதில்லை என்பதை மாணவர்கள் புரிந்துகொள்வதற்குள் அவர்களுடைய கல்லூரிக்காலம் முடிந்துவிடும். இதனால் ஏற்படும் அடிதடி, வன்முறை கலாசாரம், போதைப் பழக்கம், காவல் துறை வழக்குகள் போன்ற எதிர்மறை விளைவுகளைப் பற்றி எவ்வளவு அறிவுறுத்தினாலும் மாணவர்களுக்குப் புரிவதில்லை.