சர்தார் படேலை பிரதமர் கொண்டாடுவது ஏன்?

சர்தார் வல்லபாய் படேலின் தியாக மனப்பான்மை குறித்து நாம் சிந்திக்க வேண்டும். 1946-ஆம் ஆண்டில், அகில இந்திய காங்கிரஸ் கமிட்டியின் தலைவராக இருந்த அபுல்கலாம் ஆசாத்தின் பதவிக் காலம் முடிவடைந்தது.

- டாக்டர் எச்.வி.ஹண்டே

இந்தப் பதவிக்கு மீண்டும் ஒருவரைத் தேர்ந்தெடுப்பதற்காக மகாத்மா காந்தி அவர்களின் யோசனையின்படி, மொத்தம் இருந்த 15 பிரதேச காங்கிரஸ் கமிட்டி தலைவர்களுக்கு, ‘நீங்கள் அகில இந்திய காங்கிரஸ் தலைவராக வருவதற்கு யாரை விரும்புகிறீர்கள்?’ என ஒவ்வொருவருக்கும் ஒரு கேள்வித்தாள் அனுப்பப்பட்டது. இதற்கு 12 பிரதேச காங்கிரஸ் கமிட்டி தலைவர்கள், சர்தார் படேலின் பெயரை பரிந்துரை செய்தனர். மீதமுள்ள 3 நபர்கள், யாருடைய பெயரையும் குறிப்பிடவில்லை.

இதைக் கண்டு பண்டித நேரு அதிர்ச்சி அடைந்து, மகாத்மா காந்தியைச் சந்தித்து, ‘என்னால் சர்தார் படேலுக்கு கீழ் பணி யாற்ற இயலாது’ எனக் கூறினார். இவரை சமாதானப்படுத்துவதற்காக மகாத்மா காந்தி, சர்தார் படேலை அணுகி, அகில இந்திய காங்கிரஸ் தலைமை போட்டியிலிருந்து விலகிக் கொள்ளும்படி கேட்டுக் கொண்டார். ஒரு வார்த்தைகூட மறுப்பு கூறாமல் மகாத்மா காந்தியின் விருப்பத்தை சர்தார் படேல் நிறைவேற்றினார். பிறகு பண்டித நேரு அகில இந்திய காங்கிரஸ் கமிட்டி தலைவரானார்.

இதன் விளைவாகத்தான், ஓராண்டு கழித்து இந்தியா விடுதலை பெற்றவுடன், பண்டித ஜவாஹர்லால் நேரு பிரதமரானார். சர்தார் படேல் தன் தியாக உணர்வால், நம்முடைய நாட்டின் முதல் பிரதமராக வரக்கூடிய வாய்ப்பினை இழந்தார்!

சுதந்திரத்திற்குப் பிறகு பல்வேறு கட்டங்களில் பண்டித நேரு ஏற்படுத்திய பல முட்டுக்கட்டைகளையும் மீறி, பாரத நாட்டைக் காப்பாற்றியவர் சர்தார் படேல்.