தீபாவளியை கொண்டாட சொந்த ஊருக்கு புறப்பட்ட மக்கள் பேருந்து - ரயில் நிலையங்களில் அலைமோதிய கூட்டம்

தீபாவளி பண்டிகையைக் கொண்டாட சென்னை, திண்டிவனத்திலிருந்து புதன்கிழமை பொதுமக்கள் பெருமளவில் புறப்பட்டதால் கிளாம்பாக்கம், கோயம்பேடு, மாதவரம் பேருந்து நிலையங்களில் பயணிகள் கூட்டம் அலைமோதியது.

இதேபோல, சென்ட்ரல், எழும்பூர், தாம்பரம் ரயில் நிலையங்களிலும் பயணிகள் கூட்டம் நிரம்பி வழிந்தது.

தீபாவளி பண்டிகையை யொட்டி, சிறப்பு பேருந்துகள் இயக்கப்பட்டு வரும் கோயம்பேடு, கிளாம்பாக்கம், மாதவரம் உள்ளிட்ட பேருந்து நிலையங்களில் போக்குவரத்துத்துறை அமைச்சர் சா.சி.சிவசங்கர் புதன்கிழமை ஆய்வு மேற்கொண்டார்.

பின்னர் அவர் செய்தியாளர்களிடம் கூறியதாவது: சிறப்பு பேருந்துகள் இயக்கப்பட்ட முதல் நாளான திங்கள்கிழமை சென்னையிலிருந்து 1,10750 பேரும், செவ்வாய்கிழமை 2,31000 பேரும் பயணித்துள்ள நிலையில், புதன்கிழமை மாலை 1,33,925 பேரும் பயணித்துள்ளனர். இதன்படி இதுவரை 3,41,838 வரை பயணித்துள்ளனர். பயணிகளின் தேவைக்கு ஏற்ப அரசு பேருந்துகள் இயக்கப்பட்டு வருகிறது.

எதிர்பார்த்ததை விட அதிக பயணிகள் வரும்போது ஒப்பந்த அடிப்படையில் தனியார் பேருந்துகள் இயக்கப்படுகின்றன. ஓட்டுநர், நடத்துநர் பணிச்சுமையை குறைக்கவும், செலவினத்தைக் குறைக்கவும் இந்த நடவடிக்கை எடுக்கப்படுகிறது. இதனால் அரசுக்கு நிதி இழப்பில்லை. தனியார் பேருந்துகள் அனைத்தும் ஏற்கனவே அறிவித்திருந்தபடி அரசு நடத்துநருடனேயே இயக்கப்படுகிறது.