சிதம்பரம் கோவிந்தராஜப் பெருமாள் கோயில் கொடி மரத்தை மாற்ற நீதிமன்றம் தடை

சிதம்பரம் நடராஜர் திருக்கோயிலில் உள்கோயிலாக உள்ள தில்லை கோவிந்தராஜப் பெருமாள் கோயில் கொடி மரத்தை மாற்றி அமைப்பதற்கு சிதம்பரம் சார்பு நீதிமன்றம் கடந்த வியாழக்கிழமை தடை விதித்தது.

இதனால், பெருமாள் கோயில் அறங்காவலர்கள், தீட்சிதர்களிடையே ஏற்பட்ட சர்ச்சை முடிவுக்கு வந்தது.

சிதம்பரம் நடராஜர் கோயிலில் உள்கோயிலாக இந்து சமய அறநிலையத் துறை கட்டுப்பாட்டில் உள்ள தில்லை கோவிந்தராஜப் பெருமாள் கோயில் பிரம்மோற்சவம் நடத்துவது சம்பந்தமான வழக்குகள் சென்னை உயர்நீதிமன்றத்தில் நிலுவையில் உள்ளன.

இந்த நிலையில், இந்தக் கோயிலில் இந்து சமய அறநிலையத் துறை ஆணையின்பேரில், சிதிலமடைந்த கொடிமரத்தை அகற்றிவிட்டு, புதிய கொடிமரம் அமைக்க திங்கள்கிழமை (நவ.4) பாலாலயம் செய்யும் வகையில், கோயில் அறங்காவலர் திருவேங்கடம் தலைமையிலான நிர்வாகிகள் ஞாயிற்றுக்கிழமை மாலை பூர்வாங்க பூஜைகளை செய்ய முயன்றனர்.

இதற்கு தீட்சிதர்கள் எதிர்ப்புத் தெரிவித்தனர். இதையடுத்து, இருதரப்பினரிடையேயும் வாக்குவாதம் ஏற்பட்டு, போலீஸார் சமரசம் செய்து, பேச்சுவார்த்தைக்கு அழைத்துச் சென்றனர். ஆனால், பேச்சுவார்த்தையில் முடிவு எட்டப்படவில்லை.