அதிகரிக்கும் இந்திய மகளிரின் பணி நேரம்

இந்தியாவில் பெண் தொழிலாளர்களின் எண்ணிக்கை கடந்த சில ஆண்டுகளில் இருமடங்காக அதிகரித்துள்ளது. சில இடங்களில் ஆண்களைவிட கூடுதல் நேரம் பணிபுரியும் பெண்கள் உள்ளனர் என்று மத்திய அமைச்சர் மன்சுக் மாண்டவியா கூறியுள்ளார்.

- ஐவி.நாகராஜன்

முன்னாள் அமைச்சர் ஸ்மிருதி இரானியோ பிற நாடுகளை ஒப்பிடும்போது, இந்தியாவில் பெண்கள் அதிக நேரம் வேலை செய்கிறார்கள். குறிப்பாக, அறிவியல் மற்றும் தொழில்நுட்ப துறைகளில் பெண்கள் வாரம் அதிகபட்சமாக 55 மணி நேரம் வரை வேலை செய்கிறார்கள் என்று பெருமிதத்துடன் குறிப்பிட்டுள்ளார். ஆனால், அதிக வேலை நேரம் பணிபுரிவது ஆபத்தில் முடியும் என்பது சமீபத்தில் பேசு பொருளாகியுள்ளது.

கேரளத்தைச் சேர்ந்தவர் அன்னா செபாஸ்டியன் (26). இவர் சி.ஏ. படித்தவர். ஒரு பன்னாட்டு கணக்கு தணிக்கை நிறுவனத்தின் புணே கிளையில் கடந்த மார்ச் மாதம் பணியில் சேர்ந்தார். இந்த நிலையில், கடுமையான உடல் சோர்வு காரணமாக மருத்துவமனையில் அனுமதிக்கப்பட்டு அங்கு சிகிச்சை பலனின்றி ஜூலை 20-ஆம் தேதி மரணமடைந்தார்.

அதிக நேர பணி அழுத்தம்தான் அவரின் மரணத்துக்கு காரணம் என அவரது தாய் கூறினார். 'நீண்ட நேரம் பணியாற்றியதால் அவளுக்கு உடல் ரீதியாகவும், மன ரீதியாகவும் பாதிப்பை ஏற்படுத்தியது. வார விடுமுறை நாள்களிலும் பணியாற்ற வேண்டியதால் மார்ச் மாதம் பணியில் சேர்ந்தவர் ஜூலையில் பலியாகிவிட்டார்' என்று கூறினார்.