பைடனின் திட்டத்தை ரத்து செய்தது நீதிமன்றம்

வாஷிங்டன் நவ. 8: உரிய ஆவணங்கள் இல்லாமல் அமெரிக்காவில் வசிக்கும் அகதிகள் அந்த நாட்டவர்களை மணந்திருந்தால் அவர்களுக்கு நிரந்தர குடியுரிமை அளிக்க வகை செய்யும் அதிபர் ஜே பைடனின் திட்டத்தை டெக்ஸாஸில் உள்ள மாவட்ட நீதிமன்றம் ரத்து செய்துள்ளது.

இது தொடர்பாக மாவட்ட நீதிபதி ஜே. கேம்பல் பார்க்கர் வழங்கிய தீர்ப்பில், அமெரிக்க குடியேற்ற சட்ட விதிக்கூறுகளை வரம்பு மீறி பயன்படுத்தி ஜோ பைடன் தலைமையிலான அரசு இந்த திட்டத்தை வகுத்துள்ளதாக குற்றஞ்சாட்டியுள்ளார்.

ஏற்கெனவே, இந்தத் திட்டத்தின் அமலாக்கத்துக்கு நீதிபதி பார்க்கர் கடந்த ஆகஸ்ட் மாதம் இடைக்காலத் தடை விதித்தது நினைவுகூரத்தக்கது.

முன்னதாக, உரிய ஆவணங்கள் இல்லாமல் நாட்டில் தங்கியிருப்பவர்கள், அமெரிக்கர்களின் கணவர் அல்லது மனைவியாக இருந்தால் அவர்கள் நிரந்தர குடியுரிமை கோரி விண்ணப்பிக்க வகை செய்யும் திட்டத்தை பைடன் அரசு கடந்த ஜூன் மாதம் வெளியிட்டது.

அந்த திட்டத்தின் கீழ், விண்ணப்பதாரர்கள் அமெரிக்காவில் குறைந்தது 10 ஆண்டுகள் வசித்திருக்க வேண்டும். அவர்கள் அமெரிக்கர்களை மணந்து எவ்வளவு காலம் வேண்டுமானாலும் ஆகியிருக்கலாம்.