உச்சநீதிமன்றத்தின் 51-ஆவது தலைமை நீதிபதி சஞ்சீவ் கன்னா பதவியேற்பு

உச்சநீதிமன்றத்தின் 51-ஆவது தலைமை நீதிபதியாக சஞ்சீவ் கன்னா திங்கள்கிழமை பதவியேற்றார்.

குடியரசுத் தலைவர் திரெளபதி முர்மு அவருக்கு பதவிப் பிரமாணம் செய்து வைத்தார். உச்சநீதிமன்றத்தின் முன்னாள் தலைமை நீதிபதி டி.ஒய்.சந்திரசூட் ஞாயிற்றுக்கிழமை ஓய்வு பெற்றதையடுத்து, புதிய தலைமை நீதிபதியாக சஞ்சீவ் கன்னா முறைப்படி பொறுப்பேற்றார்.

இந்நிகழ்வில் குடியரசுத் துணைத் தலைவர் ஜகதீப் தன்கர், பிரதமர் நரேந்திர மோடி, மத்திய பாதுகாப்பு அமைச்சர் ராஜ்நாத் சிங், சட்ட அமைச்சர் அர்ஜூன் ராம் மேக்வால், முன்னாள் உச்சநீதிமன்ற தலைமை நீதிபதிகள் ஜே.எஸ்.கேஹர், டி.ஒய்.சந்திரசூட் மற்றும் உச்சநீதிமன்ற இன்னாள், முன்னாள் நீதிபதிகள் உள்ளிட்ட முக்கியப் பிரமுகர்கள் கலந்து கொண்டனர்.

உச்சநீதிமன்ற நீதிபதிகளுக்கான ஓய்வு பெறும் வயது 65 ஆகும். இதன் அடிப்படையில் அடுத்த ஆண்டு மே 13-ஆம் தேதியுடன் சஞ்சீவ் கன்னாவின் பதவிக் காலம் நிறைவடையவுள்ள நிலையில் 6 மாதங்கள் மட்டுமே அவர் தலைமை நீதிபதியாக பதவி வகிப்பார்.