குழந்தைகளுக்குத் தேவை அன்பும் அறிவியலும்!

இந்திய விண்வெளி வரலாற்றில் 2008 நவம்பர் 14 அன்று நிலவின் தென் துருவத்தில் இந்திய தேசியக்கொடி பதிக்கப்பட்டது.

- நெல்லை சு. முத்து

அது இந்திய விண்வெளி விஞ்ஞானிகள் நம் நாட்டு குழந்தைகளுக்கு வழங்கிய தேசியப் பரிசு என்று அறிவிக்கப்பட்டது. வேறு ஒன்றுமில்லை, சந்திரயான்-1 திட்டத்தில் டாக்டர் கலாமின் ஆலோசனைப்படி மூவர்ணக்கொடி பொறிக்கப்பட்ட எம்.ஐ.பி. என்கிற 'நிலா மோதுகலன்' சந்திரனின் 'ஷேக்கிள்டன்' பள்ளத்தில் மோதி இறங்கியது. அந்த இடத்திற்கு 'ஜவாஹர் தளம்' என்று பெயரிடப்பட்டுள்ளது.

குழந்தைகள் தோட்டத்தில் உள்ள மொட்டுகள் போன்றவர்கள், அவர்கள் தேசத்தின் எதிர்காலம், நாளைய குடிமக்கள் என்பதால் கவனமாகவும் அன்பாகவும் வளர்க்கப்பட வேண்டும்... இன்றைய குழந்தைகள் நாளைய இந்தியாவை உருவாக்குவார்கள். நாம் அவர்களை வளர்க்கும் விதம் தான் எதிர்காலத்தைத் தீர்மானிக்கும். - இதுவே பண்டித ஜவாஹர்லால் நேருவின் தொலைநோக்குப் பார்வை.

1963 நவம்பர் 21 அன்று தும்பா ஏவுதளத்திலிருந்து நைகி அப்பாச்சி என்னும் முதலாவது ஏவூர்தி தொடங்கி சந்திரன், செவ்வாய், சூரியன் போன்ற அண்டவெளி ஆய்வுகளுக்கு வித்திட்டவர்கள் நேரு, ஹோமி பாபா, விக்ரம் சாராபாய் ஆகியோர்.

நாடு சுதந்திரம் அடைவதற்கு முன்பே 1946 செப்டம்பர் 2 அன்று 'இந்தியாவின் தற்காலிக அரசாங்கம்' எனப்படும் இடைக்கால அரசாங்கத்தின் துணைத் தலைவராக பிரிட்டிஷ் வைஸ்ராய் நியமியினால் நியமிக்கப்பட்டவர் நேரு.

அவ்வாறே, சுதந்திர இந்தியாவில் 1947 ஆகஸ்ட் 20 அன்று பல்வேறு அமைச்சர்கள், துறைச் செயலர்கள், அறிவியல், தொழில்துறை ஆராய்ச்சிக் குழும நிபுணர்கள் பங்கெடுத்த இந்திய அறிவியல் மாநாட்டில், ஜவாஹர்லால் நேரு, 'பசியோடு இருக்கும் ஆணோ பெண்ணோ யாருக்கும் சத்தியம் என்பதில் எந்த அர்த்தமும் இல்லை. அவனுக்கு அல்லது அவளுக்குத் தேவை உணவு. வயிறு வதங்கிக் கிடப்பவரிடம் சத்தியம் என்றோ, சாமி என்றோ, அதனினும் அரிய விஷயங்கள் குறித்தோ பேசுவது வெறும் கேலிக்கூத்து ஆகும். இங்கு ஒவ்வொருவருக்கும் தேவைப்படும் உணவு, உடை, இருப்பிடம், கல்வி, சுகாதாரம் போன்ற அடிப்படை வசதிகள் யாவும் வழங்கப்பட வேண்டும்' என்று வலியுறுத்தினார்.