டிரம்ப்பின் வெற்றியும் எதிர்பார்ப்பும்!

இந்தியாவிற்கும் அமெரிக்காவிற்கும் 20,000 கோடி டாலர் அளவிலான வர்த்தகம் இருந்து வருகிறது. இதனால் இரு நாடுகளுமே இறக்குமதி வரியைக் குறைக்க வேண்டும் என்ற எதிர்பார்ப்புடன் அணுகுவார்கள். அதன் முடிவு எப்படி அமையும் என்பதைப் பொறுத்திருந்துதான் பார்க்க வேண்டும்.

அமெரிக்காவின் 47-ஆவது அதிபராக குடியரசுக் கட்சியின் டொனால்ட் டிரம்ப் மீண்டும் தேர்வு செய்யப்பட்டுள்ளார். போட்டி கடினமாக இருக்கும் என்று எதிர்பார்க்கப்பட்ட நிலையில் டொனால்ட் டிரம்ப் எளிதாக வெற்றி பெற்றுள்ளார்.

78 வயதுடைய டொனால்ட் டிரம்ப்பின் வெற்றி, அமெரிக்கா இன்னும் ஒரு பெண்ணின் தலைமையை ஏற்கும் மனப்பக்குவத்தைப் பெறவில்லை என்பதை மீண்டும் உறுதிப்படுத்துகிறது. முதலாளித்துவம் அமெரிக்கா நம்பும் சித்தாந்தம் என்பதையும் அந்நாடு ஒப்புக்கொண்டுள்ளது.

அமெரிக்க அதிபர் தேர்தலில் மொத்தமுள்ள 538 பிரதிநிதிகளின் வாக்குகளில் யார் 270 அல்லது அதற்கும் அதிகமான வாக்குகளைப் பெறுகிறாரோ அவரே வெற்றி பெறுவார். டிரம்ப் 312 வாக்குகளைப் பெற்று வெற்றி பெற்றுள்ளார். டிரம்ப்புக்கும் ஹாரிஸுக்கும் இடையிலான போட்டி, எதிர்பார்த்தது போல கடுமையான போட்டியாக இருக்கவில்லை. வெற்றியைத் தீர்மானிக்கும் முக்கிய மாகாணங்களில் பெரும்பாலான அமெரிக்கர்கள் டிரம்ப்புக்கு வாக்களித்துள்ளனர். இந்தத் தேர்தலில் 'நாட்டின் பொருளாதாரம் மற்றும் குடியேற்றப் பிரச்னையை முன்னிறுத்தியே டிரம்ப் பரப்புரை செய்தார்.

அமெரிக்காவில் கரோனா பெருந்தொற்றுக்குப் பிறகு பணவீக்கம் கடுமையாக உயர்ந்துள்ளது. 1970களில் இருந்ததை விட பணவீக்கம் அதிகரித்திருப்பதும் அதனை மக்கள் தங்கள் அன்றாடங்களில் உணர்கிறார்கள் என்பதையும் புரிந்து கொண்ட டிரம்ப் அதனையே ஒரு வாய்ப்பாக எடுத்துக் கொண்டு 'நான்கு ஆண்டுகளுக்கு முன்பு இருந்ததை விட நீங்கள் இப்போது செழிப்பாக இருக்கிறீர்களா? என்ற கேள்வியை அமெரிக்க மக்கள் முன்வைத்தார்.

பணவீக்கப் பிரச்னையை எதிர்கொண்டுள்ள வாக்காளர்கள் மாற்றத்துக்காகக் காத்திருந்துள்ளனர் என்பதை டிரம்ப் பெற்றுள்ள வாக்குகள் நிரூபிக்கின்றன. பைடனின் திட்டங்களை மக்கள் விரும்பவில்லை என்பதைத் தாண்டி எதிர்மறையான எண்ணங்களையும் கொண்டிருந்தனர். இதன் விளைவுகளை கமலா ஹாரிஸ் எதிர்கொள்ளும் படியானது அவருக்குப் பின்னடைவைத் தந்துள்ளது. டிரம்ப் மீது நம்பிக்கையை ஏற்படுத்தியுள்ளது.