‘ஒரே நாடு - ஒரே சந்தா’, தேசிய இயற்கை வேளாண் இயக்கத்துக்கு மத்திய அமைச்சரவை ஒப்புதல்

புது தில்லி, நவ.25: ‘ஒரே நாடு ஒரே சந்தா’ திட்டம், தேசிய இயற்கை வேளாண் இயக்கம், அருணாசல பிரதேசத்தில் இரு நீர்மின் நிலையங்கள் அமைக்கும் திட்டம், அடல் புதுமை இயக்கம் நீட்டிப்பு ஆகியவற்றுக்கு பிரதமர் மோடி தலைமையில் திங்கள்கிழமை நடைபெற்ற மத்திய அமைச்சரவை கூட்டத்தில் ஒப்புதல் அளிக்கப்பட்டது.

அமைச்சரவை கூட்டத்தில் எடுக்கப்பட்ட முடிவுகள் குறித்து மத்திய செய்தி ஒலிபரப்புத்துறை அமைச்சர் அஸ்வினி வைஷ்ணவ் செய்தியாளர்களிடம் கூறியதாவது:

கல்வித் துறையில் கடந்த பத்தாண்டுகளில் மேற்கொள்ளப்பட்ட பல்வேறு முன்னெடுப்புகளின் நோக்கங்களை மேலும் விரிவுபடுத்தவும் மக்களிடையே இதைக் கொண்டு சேர்க்கும் விதமாகவும் ‘ஒரே நாடு - ஒரே சந்தா’ என்ற புதிய திட்டம் அறிமுகப்படுத்தப்படவுள்ளது.

இதன்மூலம் இளைஞர்களுக்கு தரமான உயர்கல்வி வழங்கப்படுவது உறுதி செய்யப்படவுள்ளது.

வளர்ச்சியடைந்த பாரதம் இலக்கை எட்ட புதிய கல்விக் கொள்கையின் பரிந்துரையின்படி பல்கலைக்கழகங்கள், கல்லூரிகள், ஆய்வகங்கள் உள்ளிட்டவற்றில் ஆய்வை மேம்படுத்துவதற்காக தொடங்கப்பட்ட அணுசந்தான தேசிய ஆராய்ச்சி நிறுவனத்தின் முன்னெடுப்புகளுக்கு உறுதுணையாக இந்த திட்டம் தொடங்கப்பட்டுள்ளது.

ரூ.6,000 கோடி ஒதுக்கீடு: இந்த திட்டத்தின் கீழ் ஆய்வுக் கட்டுரைகள் மற்றும் இதழ்களைக் காண நாடு முழுவதும் ஒரே மாதிரியான சந்தா முறையை பின்பற்ற ரூ.6,000 கோடி நிதி ஒதுக்கப்பட்டுள்ளது.

2025, 2026, 2027 ஆகிய மூன்று ஆண்டுகளுக்கு இந்த திட்டம் செயல்படுத்தப்படவுள்ளது.