இசைவாணியின் கானா பாடல் சர்ச்சை: சட்டப்படி நடவடிக்கை

பாடகி இசைவாணியின் கானா பாடல் சர்ச்சை தொடர்பாக சட்ட வல்லுநர்களுடன் ஆலோசித்து, தவறு இருப்பின் உறுதியான நடவடிக்கையை அரசு எடுக்கும் என அறநிலையத் துறை அமைச்சர் சேகர்பாபு கூறினார்.

சென்னை பாரிமுனை அருகில் உள்ள கந்தகோட்டம்முத்துக்குமாரசாமி திருக்கோயிலில் அறுபடை வீடு ஆன்மிகப் பயணத்தின் முதற்கட்ட பயணத்தில் பங்கேற்கும் 200 மூத்த குடிமக்களுக்கு பயண வழிப்பைகளை அமைச்சர் சேகர்பாபு செவ்வாய்க்கிழமை வழங்கி, ஆன்மிகப் பயணப் பேருந்துகளை கொடியசைத்து தொடங்கி வைத்தார்.

இதையடுத்து அவர் செய்தியாளர்களிடம் கூறியது:

இந்தத் திட்டத்தின் கீழ் சென்னை மண்டலத்திலிருந்து 90 நபர்களும், காஞ்சிபுரத்தில் 60 நபர்களும், வேலூரில் 50 நபர்களும் என மொத்தம் 200 நபர்கள் 3 நாட்கள் ஆன்மிகப் பயணமாகப் புறப்படுகின்றனர். 2025 ஆண்டு மார்ச் மாதத்துக்குள் 1,008 மூத்த குடிமக்கள் அறுபடை வீடு ஆன்மிகப் பயணத்தை நிறைவு செய்வர். இத்திட்டத்துக்காக அரசு ரூ.1.58 கோடி நிதி வழங்கியுள்ளது.