மருத்துவ வகுப்புகள் புறக்கணிப்பு; அறுவை சிகிச்சைகள் நிறுத்தம்

அரசு மருத்துவர் சங்கம் அறிவிப்பு

மருத்துவக் கல்லூரி வகுப்புகளைப் புறக்கணித்தல், அவசரமில்லா அறுவை சிகிச்சைகளை நிறுத்தி வைத்தல் என பல்வேறு போராட்டங்களை தமிழ்நாடு அரசு மருத்துவர் சங்கம் அறிவித்துள்ளது.

சென்னையில் தேசிய நல்வாழ்வு திட்ட அலுவலகத்தில் அண்மையில் நடைபெற்ற மக்கள் நல்வாழ்வுத் துறை ஆய்வுக் கூட்டத்தில் பங்கேற்ற அதிகாரி ஒருவர், மருத்துவத் துறையினரையும், மருத்துவர்களையும் கடுமையாக திட்டியதாகக் கூறப்படுகிறது.

இதையடுத்து, அரசு மருத்துவர்களை தரக்குறைவாக பேசும் உயர் அதிகாரிகள் மீது நடவடிக்கை எடுக்க வேண்டும். அரசு மருத்துவமனைகளில் உள்ள மருத்துவர் காலிப்பணியிடங்களை நிரப்ப வேண்டும் என்பது உள்ளிட்ட கோரிக்கைகளை வலியுறுத்தி தமிழகம் முழுவதும் அரசு மருத்துவர்கள் ஆர்ப்பாட்டம், தர்னா மற்றும் நூதன போராட்டங்களை நடத்தி வருகின்றனர்.