சென்னையை உலுக்கிய ஃபென்சால் புயல்

மரக்காணம் அருகே கரையைக் கடந்தது

சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் சூறைக் காற்று, கனமழையுடன் உலுக்கிய ஃபென்சால் புயல் சனிக்கிழமை இரவு மரக்காணம் அருகே கரையை கடக்கத் தொடங்கியது.

கரையைக் கடந்ததும் வலுவிழக்கும் புயல் தாழ்வு மண்டலமாக விரிவடைந்து மேற்குத் தொடர்ச்சி மலையைக் கடந்து கர்நாடகம், கேரளம் வழியாக அரபிக்கடலுக்குச் செல்லும் என்று வானிலை மையம் தெரிவித்தது.

புயல் கரையைக் கடக்கத் தொடங்கியதும் சென்னையில் மழை நின்றது. ஆனால், காற்று அதிகமாக வீசத்தொடங்கியது. அதே போல செங்கல்பட்டு மாவட்டத்தின் கேளம்பாக்கம், திருவிடந்தை, மாமல்லபுரம் பகுதிகளில் மணிக்கு 90 முதல் 100 கிலோ மீட்டர் வேகத்தில் காற்றுடன் மழையும் பெய்தது.

வங்கக் கடலில் கடந்த நவ. 24-ஆம் தேதி உருவான காற்றழுத்த தாழ்வுப் பகுதி, நவ.27-இல் ஆழ்ந்த தாழ்வு மண்டலமாக வலுப்பெற்றது. அது ஃபென்சால் புயலாக வெள்ளிக்கிழமை மாறியது.