மகாராஷ்டிர முதல்வராக ஃபட்னவீஸ் பதவியேற்பு

மகாராஷ்டிரத்தின் 20-ஆவது முதல்வராக பாஜக மூத்த தலைவர் தேவேந்திர ஃபட்னவீஸ் வியாழக்கிழமை பதவியேற்றார்.

துணை முதல்வர்களாக சிவசேனை தலைவர் ஏக்நாத் ஷிண்டே, தேசியவாத காங்கிரஸ் தலைவர் அஜீத் பவார் ஆகியோர் பதவியேற்றனர்.

மும்பை ஆசாத் மைதானத்தில் நடைபெற்ற பிரம்மாண்ட விழாவில் மூவருக்கும் மாநில ஆளுநர் சி.பி.ராதாகிருஷ்ணன் பதவிப் பிரமாணமும் ரகசிய காப்புப் பிரமாணமும் செய்துவைத்தார். இவ்விழாவில் பிரதமர் நரேந்திர மோடி, மத்திய அமைச்சர்கள் அமித் ஷா, ராஜ்நாத் சிங், நிதின் கட்கரி, நிர்மலா சீதாராமன், பாஜக தேசியத் தலைவர் ஜெ.பி.நட்டா உள்ளிட்டோர் பங்கேற்றனர்.

முந்தைய ஆட்சியில் முதல்வராக இருந்த ஷிண்டே, இம்முறை துணை முதல்வராகப் பதவியேற்கும் தகவலை, விழாவுக்கு சில மணி நேரம் முன்னர்தான் அவரது கட்சி உறுதிசெய்தது.

288 உறுப்பினர்களைக் கொண்ட மகாராஷ்டிர பேரவைக்கு கடந்த நவ. 20-ஆம் தேதி நடைபெற்ற தேர்தலில், பாஜக தலைமையிலான 'மகா யுதி' கூட்டணி 230 இடங்களைக் கைப்பற்றி ஆட்சியைத் தக்கவைத்தது.

இக்கூட்டணியில் 132 இடங்களுடன் பாஜக தனிப்பெரும் கட்சியாக உருவெடுத்தது. ஏக்நாத் ஷிண்டே தலைமையிலான சிவசேனை 57 இடங்களையும், அஜீத் பவார் தலைமையிலான தேசியவாத காங்கிரஸ் 41 இடங்களையும் கைப்பற்றின. அதேநேரம், எதிர்க்கட்சிகளின் 'மகா விகாஸ் அகாடி' கூட்டணி படுதோல்வியைச் சந்தித்தது. இக்கூட்டணியில் காங்கிரஸுக்கு 16, சிவசேனை (உத்தவ் தாக்கரே) கட்சிக்கு 20, தேசியவாத காங்கிரஸ் (சரத் பவார்) கட்சிக்கு 10 இடங்களே கிடைத்தன.