யூடியூப் அமர்க்களங்கள்!

அதிகமான பார்வைகள் கிடைக்க வேண்டும் என்பதற்காக தனிநபரின் அந்தரங்கத்தைப் பொதுவெளியில் பேசுவது, செய்திகளை முந்தித் தர வேண்டும் என்பதற்காக தப்பும் தவறுமாக தகவல் உரைப்பது என இதன் மற்றொரு பக்கம் அடர்கருமையில் இருக்கிறது.

- முனைவர் பவித்ரா நந்தகுமார்

கரோனா பரவலுக்குப் பிறகு சமூக ஊடகங்களைப் பயன்படுத்தும்போக்கு மக்களிடம் பன்மடங்கு பெருகிப் போனது நாம் அறிந்ததே. ஜூம், கூகுள் மீட் போன்ற இணைய சந்திப்புகள் பற்றிய அறிவு சாமானியருக்கும் தெரிய வந்தது, அதன் பிறகு தான். யூடியூப் சேவை கூட அப்படித்தான். 2005-இலேயே தொடங்கப்பட்டிருந்தாலும் வேக வேகமாக ஓடிக் கொண்டிருந்த மக்கள், ஊரடங்கு நேரத்தில் கிடைத்த நீண்ட ஓய்வுகளில்தான் யூடியூப் காணொளிகளை அதிகமாகப் பார்க்கத் தொடங்கினர். கிடைத்த ஓய்வு நேரத்தில் பலரும் யூடியூப் பக்கங்களை உருவாக்கி தங்கள் நேரத்தைப் பயனுள்ளதாக மாற்றிக் கொண்டனர். 2019-க்குப் பிறகே யூடியூப் பன்மடங்கு வளர்ச்சி அடைந்தது எனச் சொல்லலாம். 2024, மார்ச் மாத நிலவரப்படி யூடியூபானது 200 கோடியே 49 லட்சத்திற்கும் அதிகமான பயனாளர்களைக் கொண்டுள்ளது. அது மட்டுமல்ல, இந்தியாவிலிருந்து மட்டும் 460 மில்லியனுக்கும் அதிகமான பயனாளர்களைக் கொண்டுள்ளது. உலகின் அதிக மக்கள் தொகை கொண்ட நாடாக இந்தியா இருப்பதால் யூடியூபின் மிகப் பெரிய சந்தையாகவும் மாறி உள்ளது.

சந்தா தேவைப்படும் பெரும்பாலான காணொளித் தளங்களைப் போல் அல்லாமல், யூடியூப் ஒரு கவர்ச்சிகரமான தளமாகும். சந்தாதாரர்கள் மற்றும் பார்வைகளின் எண்ணிக்கை அடிப்படையில் ஒரு யூடியூபின் தரமும் செயல் திறனும் மதிப்பீடு செய்யப்படுகிறது.