டங்ஸ்டன் சுரங்கம் வருமானால் முதல்வர் பொறுப்பில் இருக்க மாட்டேன்: மு.க.ஸ்டாலின்

எதிர்க்கட்சித் தலைவர் எடப்பாடி பழனிசாமியுடன் கடும் விவாதம்

மதுரையில் டங்ஸ்டன் சுரங்கம் வரும் சூழல் வந்தால், முதல்வர் பொறுப்பில் இருக்க மாட்டேன் என்று சட்டப்பேரவையில் முதல்வர் மு.க.ஸ்டாலின் தெரிவித்தார்.

எதிர்க்கட்சித் தலைவர் எடப்பாடி பழனிசாமியுடன் நடந்த கடும் விவாதங்களுக்கு இடையே முதல்வர் இவ்வாறு கூறினார்.

எதிர்க்கட்சித் தலைவர் பேச்சு: டங்ஸ்டன் சுரங்கம் அமைப்பதற்கான உரிமத்தை உடனே ரத்து செய்ய வேண்டும் என்று மத்திய அரசை வலியுறுத்தி சட்டப்பேரவையில் நிறைவேற்றப்பட்ட தீர்மானத்தின் மீது எதிர்க்கட்சி தலைவர் எடப்பாடி பழனிசாமி பேசியது: மதுரை நாயக்கர்பட்டி கிராமத்தில் டங்ஸ்டன் சுரங்கம் அமைக்க மத்திய அரசு உரிமம் வழங்கி இருப்பது அப்பகுதி மக்களுக்கு பதற்றத்தை ஏற்படுத்தியுள்ளது. இந்த உரிமத்தை ரத்து செய்ய வலியுறுத்தி பிரதமருக்கு முதல்வர் 2024, நவம்பர் 20-இல் கடிதம் எழுதியதாக அரசின் செய்திக்குறிப்பில் கூறப்பட்டுள்ளது.

முதல்வரின் கடிதத்தில் 2023, அக்டோபர் 3-இல் மத்திய அமைச்சருக்கு தமிழக அரசின் நீர்வளத் துறை அமைச்சர் கடிதம் எழுதியதாகவும், அதற்கு 2023 நவம்பர் 2-இல் கடிதம் பெறப்பட்டதாகவும் கூறப்பட்டுள்ளது. இந்த 2 கடிதங்களின் விவரங்களும் எங்களுக்குத் தெரிவிக்கப்படவில்லை. 2023-இல் மத்திய அரசு கொண்டுவந்துள்ள சுரங்கங்கள் மற்றும் கனிமங்கள் (வளர்ச்சி மற்றும் ஒழுங்குமுறை) சட்டத்திருத்தம் அமலுக்கு வந்தது தொடர்பாக மத்திய அரசு 2023, செப்டம்பர் மாதமே அனைத்து மாநிலங்களுக்கும் கடிதம் எழுதியுள்ளது.