அரிட்டாபட்டி டங்ஸ்டன் சுரங்க திட்டத்தை கைவிட மத்திய அமைச்சரிடம் அண்ணாமலை வலியுறுத்தல்

மதுரை மாவட்டம், அரிட்டாபட்டியில் டங்ஸ்டன் சுரங்கம் அமைப்பதைக் கைவிட வலியுறுத்தி தில்லியில் மத்திய நிலக்கரி மற்றும் சுரங்கத் துறை அமைச்சர் கிஷண் ரெட்டியிடம் தமிழக பாஜக தலைவர் கே.அண்ணாமலை வியாழக்கிழமை நேரில் வலியுறுத்தினார்.

அப்போது, இந்த விவகாரத்தில் விரைவில் சாதகமான முடிவு எடுக்கப்படும் என்று அமைச்சர் தன்னிடம் தெரிவித்ததாக அண்ணாமலை கூறியுள்ளார்.

மதுரை மாவட்டம், அரிட்டாபட்டி பகுதியில் டங்ஸ்டன் சுரங்கம் அமைப்பதற்கு அந்தப் பகுதியைச் சேர்ந்த மக்களிடையே எதிர்ப்பு எழுந்துள்ளது.

இதற்கு மத்திய அரசு அனுமதி வழங்கக் கூடாது என்று வலியுறுத்தி தமிழக சட்டப்பேரவையில் டிசம்பர் 9-ஆம் தேதி ஒருமனதாக தீர்மானம் நிறைவேற்றப்பட்டது.

மக்களவையிலும் புதன்கிழமை இந்த விவகாரத்தை திமுக, காங்கிரஸ் உறுப்பினர்கள் எழுப்பினர்.