மந்தனா, ரேணுகா அதிரடி; இந்திய மகளிர் அணி அபார வெற்றி

மேற்கிந்தியத் தீவுகள் மகளிர் அணிக்கு எதிரான முதல் ஒருநாள் கிரிக்கெட்டில், இந்திய மகளிர் அணி 211 ரன்கள் வித்தியாசத்தில் ஞாயிற்றுக்கிழமை அபார வெற்றி பெற்றது.

முதலில் இந்தியா 50 ஓவர்களில் 9 விக்கெட்டுகள் இழப்புக்கு 314 ரன்கள் சேர்க்க, மேற்கிந்தியத் தீவுகள் 26.2 ஓவர்களில் 103 ரன்களுக்கே ஆட்டமிழந்தது. இந்தியாவின் இன்னிங்ஸில் ஸ்மிருதி மந்தனா, பிரதிகா ராவல், ஹர்லீன் தியோல் ஆகியோர் அதிரடியாக பேட்டிங் செய்ய, பௌலிங்கில் ரேணுகா சிங் தாக்குர் அசத்தினார். அவரே ஆட்டநாயகி ஆனார்.

முன்னதாக இந்த ஆட்டத்தில் டாஸ் வென்ற மேற்கிந்தியத் தீவுகள் அணி, பந்துவீச்சை தேர்வு செய்தது. இந்திய லெவனில் மாற்றமாக, காயத்தால் கடைசி இரு டி20 ஆட்டங்களில் விளையாடாத இந்திய கேப்டன் ஹர்மன்பிரீத் கௌர், அதிலிருந்து மீண்டு ஆட்டத்தில் இணைந்தார். மேலும், ஆஃப்-ஸ்பின்னர் பிரதிகா ராவலுக்கு அறிமுக வாய்ப்பு அளிக்கப்பட்டது.