மன்மோகன் சிங் என்றொரு மாமனிதர்!

துவாக ஒரு பிரபலமான மனிதரோ, உயர் பதவியில் இருக்கிற அல்லது இருந்த ஒருவரோ மறைந்து விட்டால் ஈடு செய்ய முடியாத இழப்பு என்று சொல்வது சம்பிரதாயம். ஆனால், டாக்டர் மன்மோகன் சிங்கின் மறைவு, அவர் சார்ந்திருந்த அரசியல் கட்சிக்கு மாத்திரமல்லாமல், இந்திய தேசத்திற்கே ஈடு செய்ய முடியாத பேரிழப்பு என்று குறிப்பிட்டால், அது சம்பிரதாயத்திற்காக அல்ல - முற்றிலும் உண்மையான கூற்று.

- கே.வி.கே. பெருமாள்

மத்திய அரசில், முன்னாள் அமைச்சர் ப.சிதம்பரத்திடம் நீண்ட காலம் பணியாற்றியதன் காரணமாக, உயர் பதவிகள் வகித்த பலரோடு பேசுவதற்கும், சிலரோடு பழகுவதற்கும், அவர்களது திறமை பற்றி நுணுக்கமாக அறிந்து கொள்வதற்கும் எனக்கு வாய்ப்புக் கிட்டியது.

நான் பார்த்த அரசியல்வாதிகளில் - நிர்வாகிகளில், முற்றிலும் மாறுபட்ட ஒரு மனிதராக டாக்டர் மன்மோகன் சிங் விளங்கினார். வர்த்தகத் துறையில் பொருளாதார ஆலோசகர் என்ற பதவியில் தொடங்கி, நிதித் துறையில் தலைமைப் பொருளாதார ஆலோசகர், மத்திய நிதித் துறை செயலர், இந்திய ரிசர்வ் வங்கியின் ஆளுநர், திட்டக் குழுவின் துணைத் தலைவர் என்று படிப்படியாக உயர்ந்து, பின்னர் இந்திய நிதி அமைச்சராக விளங்கி, கடைசியில் உலகின் மிகப் பெரிய ஜனநாயக நாட்டின் பிரதமர் என்ற தலைமைப் பதவிக்கு வந்தார் என்றாலும், தான் வகித்த பதவிகள் எதையுமே அவர் பதவிகளாகப் பார்த்ததில்லை - மாறாக, அவற்றை எல்லாம் தனக்குக் கொடுக்கப்பட்ட பொறுப்புகளாக-விடுக்கப்பட்ட சவால்களாக ஏற்றுக் கொண்டு, இடைவிடாமல் உழைத்தார். அந்த தன்னலமற்ற உழைப்புதான் இன்று அவரைப் பற்றி ஒவ்வொருவரையும் பேச வைத்திருக்கிறது.

எளிமைக்கும், நேர்மைக்கும் உதாரணமாகக் காட்டப்படக் கூடிய தகுதி பெற்றவராக அவர் திகழ்ந்தார். உணவு, உடை என்று எல்லாவற்றிலும் எளிமையைக் கடைப்பிடித்தவர். வீட்டிலிருந்து கொண்டுவரும் 2 அல்லது 3 சப்பாத்திகளும், வேகவைத்த சிறிது காய்கறிகளுமே அவரது மதிய உணவு. மதிய உணவுக்காக வீட்டுக்குச் சென்றாலும் ஒரு மணி நேரத்தில் அலுவலகம் திரும்பி விடுவார்.

கடைநிலை ஊழியரிடம்கூட கடிந்து பேச மாட்டார். பேச்சிலும் செயலிலும் தன்னால் யாரும் காயப்பட்டுவிடக் கூடாது என்பதில் மிக உறுதியாக இருப்பார். பத்திரிகையாளர்கள் எவ்வளவு கோபப்படுத்தும் கேள்விகளைக் கேட்டாலும், சாதாரணமாக அவர்களது கேள்விகளை எதிர்கொள்வார்.