தமிழ்ப் பல்கலை.யில் துணைவேந்தர் - பதிவாளரின் ‘பொறுப்பு நீக்கம்’ கடிதங்களால் குழப்பம்

தஞ்சாவூர் தமிழ்ப் பல்கலைக்கழகத்தில் பொறுப்புத் துணைவேந்தரும், பொறுப்பு பதிவாளரும் ஒருவருக்கொருவர் அனுப்பிய பொறுப்பு நீக்கம் குறித்த கடிதங்களால் பேராசிரியர்களிடையே குழப்பம் நிலவுகிறது.

இப்பல்கலைக்கழகத்தில் 2017 - 18 ஆம் ஆண்டில் பேராசிரியர்கள், இணைப் பேராசிரியர்கள், உதவி பேராசிரியர்கள் என 40 பேர் பணி நியமனம் செய்யப்பட்டனர். இவர்கள் உரிய தகுதி இல்லாமல் முறைகேடாக நியமிக்கப்பட்டதாக எழுந்த புகாரைத் தொடர்ந்து, ஊழல் தடுப்பு காவல் பிரிவினர் வழக்குப் பதிவு செய்துள்ளனர். இந்த வழக்கு விசாரணையில் உள்ள நிலையில், 40 பேருக்கும் தகுதிகாண் பருவம் முடிக்கப்பட்டதாக அறிவிக்கப்பட்டது.

இதுதொடர்பாக துணைவேந்தராக இருந்த வி. திருவள்ளுவனை ஆளுநர் ஆர்.என். ரவி நவம்பர் மாதம் பணியிடை நீக்கம் செய்து உத்தரவு பிறப்பித்தார்.

இதைத்தொடர்ந்து, துணைவேந்தர் பொறுப்புக் குழு நியமிக்கப்படும் வரை பொறுப்புத் துணைவேந்தராக தொழில் மற்றும் நில அறிவியல் துறைப் பேராசிரியர் க. சங்கரை ஆளுநர் நியமித்தார்.