2024-இல் 210 பேர் கைது; 100 சதவீத தண்டனை விகிதம்: என்ஐஏ

நிகழாண்டில் குற்றஞ்சாட்டப்பட்ட 210 பேர் கைது செய்யப்பட்டதாக தேசிய புலனாய்வு முகமை (என்ஐஏ) செவ்வாய்க்கிழமை தெரிவித்தது.

சில வழக்குகளில் குற்றவாளிகளுக்கு 100 சதவீத தண்டனை விகிதத்தை உறுதிசெய்ததாகவும் என்ஐஏ தெரிவித்தது.

2024-இல் மேற்கொண்ட நடவடிக்கைகள் குறித்து என்ஐஏ வெளியிட்ட செய்திக்குறிப்பில், '80 வழக்குகளில் தொடர்புடைய பல்வேறு குற்றச் செயல்களில் ஈடுபட்ட 210 பேர் கைது செய்யப்பட்டனர். அதிகபட்சமாக இடதுசாரி பயங்கரவாதம் தடுப்பு நடவடிக்கையாக 28 வழக்குகள் பதியப்பட்டு 69 பேர் கைது செய்யப்பட்டனர். இதே பிரிவில் 12 குற்றப்பத்திரிகைகள் தாக்கல் செய்யப்பட்டு 64 பேர் குற்றஞ்சாட்டப்பட்டுள்ளனர்.

வடகிழக்கு பிராந்திய கிளர்ச்சி சார்ந்த 18 வழக்குகள் பதியப்பட்டன. இதில் 15 பேர் கைது செய்யப்பட்டனர்.

அதேபோல் 25 வழக்குகளில் குற்றஞ்சாட்டப்பட்ட 68 பேருக்கு தண்டனை வழங்கப்பட்டது. 408 பேர் மீது குற்றப்பத்திரிகை தாக்கல் செய்யப்பட்டது.