தரவுப் பாதுகாப்பு விதி ஒழுங்குமுறை-புதுமைக்கு இடையே சமநிலையை உறுதிப்படுத்தும்

மத்திய அமைச்சர் அஸ்வினி வைஷ்ணவ்

மத்திய அரசு சார்பில் வெளியிடப்பட்டுள்ள எண்ம தனிநபர் தரவுப் பாதுகாப்புக்கான வரைவு விதி குடிமக்களின் உரிமைகளை முழுமையாகப் பாதுகாக்கும் என்பதோடு, தரவுப் பயன்பாடு ஒழுங்குமுறைக்கும் புதிய கண்டுபிடிப்புகளுக்கும் இடையே சமநிலையையும் உறுதிப்படுத்தும் என்று மத்திய மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் கூறினார்.

எண்ம தனிநபர் தரவுப் பாதுகாப்புக்கான வரைவு விதிகளை 'மைகவ்' வலைதளத்தில் வெளியிட்டுள்ள மத்திய அரசு, பொதுமக்களிடமிருந்து வரும் பிப்ரவரி 18-ஆம் தேதி வரை கருத்துகள் மற்றும் ஆலோசனைகளை வரவேற்றுள்ளது.

இந்த வரைவு விதியின்படி, தனி நபர் தரவுகளை எந்தவொரு வடிவத்தில் பயன்படுத்துவதாக இருந்தாலும், அந்த நபரின் வெளிப்படையான ஒப்புதலைப் பெற வேண்டும். குழந்தைகளின் தரவுகளாக இருக்கும் நிலையில், அவர்களின் பெற்றோரின் ஒப்புதலைப் பெற வேண்டும்.

இவ்வாறு, தனிநபர் தரவுகளை சேகரித்துப் பயன்படுத்துபவர்களை தரவு நம்பிக்கையாளர் என்று இந்த வரைவுச் சட்டம் குறிப்பிடுகிறது. இணைய வணிகம் (இ-காமர்ஸ்), சமூக ஊடகங்கள், விளையாட்டு வலைதளங்கள் ஆகியவை இந்த தரவு நம்பிக்கையாளர் பிரிவின் கீழ் வருகின்றனர்.