நிகழாண்டில் காத்திருக்கும் சவால்கள்

மக்களவைத் தேர்தல், மகாராஷ்டிரம் உள்பட 7 மாநிலங்கள் மற்றும் ஜம்மு-காஷ்மீர் யூனியன் பிரதேசத்தின் பேரவைத் தேர்தல் என ஜனநாயக திருவிழாக்களின் பரபரப்புக்குப் பஞ்சமில்லாமல் கடந்து சென்றது 2024-ஆம் ஆண்டு. 2025-இல் அரசியல் முக்கியத்துவம் வாய்ந்த தில்லி, பிகார் ஆகிய 2 மாநிலங்களின் பேரவைத் தேர்தல்கள் மட்டுமே நடைபெறவுள்ளன. எனினும், மக்களவையில் தனிப் பெரும்பான்மை பெறத் தவறிய பாஜகவுக்கும் எதிர்க்கட்சி கூட்டணியின் தலைமை அந்தஸ்தை தக்க வைக்க போராடும் காங்கிரஸுக்கும் நிகழாண்டில் காத்திருக்கும் சவால்கள் குறித்து பார்ப்போம்.

பாஜக - அசுர பலத்தை மீட்க ஆயத்தம்

கூட்டணியாக 400 தொகுதிகளுக்கு மேல் வெற்றிப் பெற்று, 3-ஆவது முறையாக தனிபெரும்பான்மையுடன் ஆட்சி அமைப்போம் என்ற நம்பிக்கையுடன் களமிறங்கிய பாஜக, தோ்தல் முடிவில் கூட்டணி ஆட்சியில் அரியணையேறியது.

மக்களவையுடன் சோ்ந்து பேரவைத் தோ்தல் நடைபெற்ற 4 மாநிலங்களிலும் பாஜக அல்லது அதன் ஆதரவுக் கூட்டணியே ஆட்சியைக் கைப்பற்றியது. ஆனால், மிகவும் எதிா்பாா்க்கப்பட்ட உத்தர பிரதேசம், மகாராஷ்டிரத்தில் நேரிட்ட அதிா்ச்சி தோல்வி பாஜகவுக்கு பேரிடியாக அமைந்தது.

இதிலிருந்து உடனடியாக மீண்டு, ஹரியாணா, மகாராஷ்டிர பேரவைத் தோ்தலில் ‘இண்டி’ கூட்டணிக்கு மீண்டும் வாய்ப்பளிக்காமல் பாஜக பிரம்மாண்ட வெற்றியடைந்தது.

மக்களவையில் பெரும்பான்மை பெறத் தவறிய காரணமான மாநிலங்களில் பலவீனங்களை கண்டறிந்து, அடுத்தடுத்து தோ்தல்களில் அசுர பலத்துடன் வெற்றியைத் தொடர கட்சிப் பணிகளை பாஜக நிகழாண்டு மேலும் தீவிரப்படுத்த வேண்டிய நிலையில் உள்ளது.

தில்லி, பிகாரில்...

முதலில், பேரவைத் தோ்தல் எதிா்வரும் தில்லி, பிகாரிலேயே பாஜகவுக்கான புதிய சவால்கள் நிறைந்திருக்கின்றன.

தில்லி தோ்தலுக்கு இன்னும் சில மாதங்கள் உள்ள சூழலில், கடந்த ஆண்டின் இறுதிலேயே வேட்பாளா்களை அறிவித்துவிட்டு ஆளும் ஆம் ஆத்மி தோ்தல் பணியைத் தொடங்கிவிட்டது.

சிறையிலிருந்து வெளியானதை அடுத்து முதல்வா் பதவியைத் துறந்த அரவிந்த் கேஜரிவாலின் வியூகத்துக்கு வாக்காளா்களின் அனுதாபம் கிடைத்துவிடாமல், தலைநகா் தில்லியில் ஆட்சியைப் பிடிப்பதே பாஜகவுக்கு முக்கிய சவால்.