இனியும் தாமதம் தகாது!

ஆசிரியர் தேர்வு வாரியத்திடம் தகுதித்தேர்வை நடத்தும் முக்கியப் பொறுப்பை தற்போது அரசு வழங்கியுள்ளது. இதன் தொடர்ச்சியாக உதவிப் பேராசிரியர்களை போட்டித் தேர்வின் மூலம் தேர்வு செய்யும் அடுத்த கடமையும் வாரியத்துக்கு உள்ளது.

- கல்வியாளர்

அரசு கலை மற்றும் அறிவியல் கல்லூரிகளில் உதவிப் பேராசிரியர்கள் நியமனத்தில் ஏற்படும் தாமதம் தற்போது பேசு பொருளாகியுள்ளது. ஏனெனில், தமிழ்நாட்டில் அரசுப் பணிக்கு பணியாளர்களைத் தேர்வு செய்யும் இரண்டு முக்கிய நிறுவனங்களாக தமிழ்நாடு அரசுப் பணியாளர் தேர்வாணையமும், தமிழ்நாடு ஆசிரியர் தேர்வு வாரியமும் உள்ளன. அடுத்த நிலையில் தமிழ்நாடு சீருடைப் பணியாளர் தேர்வாணையம் உள்ளது.

தமிழகத்தைப் பொருத்தவரை படித்த இளைஞர்களின் அரசுப் பணி எனும் கனவை இந்தத் தேர்வாணையங்கள் நனவாக்கி வருகின்றன. ஏறத்தாழ 80 லட்சத்துக்கும் மேற்பட்ட தேர்வர்கள், இந்தத் தேர்வாணையங்கள் நடத்தும் தேர்வுக்காக தொடர்ச்சியாகத் தயாராகி வருகின்றனர்.

கடந்த 2012-ஆம் ஆண்டு கலை மற்றும் அறிவியல்கல்லூரிகளில் 1,093 உதவிப் பேராசிரியர் பணியிடங்களுக்கான தேர்வு அறிவிப்பை வெளியிட்டு நீண்ட தாமதத்துக்குப் பிறகு 2015-ஆம் ஆண்டில் இறுதித் தேர்ச்சிப் பட்டியலை ஆசிரியர் தேர்வு வாரியம் வெளியிட்டதே கடைசி நியமனமாக உள்ளது.

மீண்டும் சுமார் 2,340 உதவிப் பேராசிரியர் பணியிடங்களுக்கான அறிவிப்பு கடந்த 2019-ஆம் ஆண்டு ஆகஸ்ட் மாதம் வெளியிடப்பட்டது. சான்றிதழ் சரிபார்ப்பு போன்ற பல்வேறு நிலைகளைக் கடந்த பிறகு, 2021-ஆம் ஆண்டு நவம்பரில் இந்த அறிவிப்பு முழுமையாக ரத்து செய்யப்பட்டது.

இதற்கு அடுத்தபடியாக 2024-ஆம் ஆண்டு மார்ச் மாதம் சுமார் 4,000 உதவிப் பேராசிரியர் பணியிடங்களுக்கான அறிவிப்பை ஆசிரியர் தேர்வு வாரியம் வெளியிட்டது. இதில் சான்றிதழ்கள், நேர்முகத் தேர்வு, பணி அனுபவம் அடிப்படையில் உதவிப் பேராசிரியர்களைத் தேர்வு செய்யும் முந்தைய தேர்வு முறையுடன் கூடுதலாக போட்டித் தேர்வாக நடத்தும் வகையில் தேர்வு முறையை வாரியம் மாற்றி அமைத்தது.

இந்த மாற்றம் வரவேற்கத்தக்கதே. எனினும், இதற்கான தேர்வு, ஆகஸ்ட் 2024-இல் நடைபெறும் என அறிவித்திருந்த நிலையில், நிர்வாகக் காரணங்களால் தேர்வை ஒத்திவைப்பதாக வெளியிட்ட ஆசிரியர் தேர்வு வாரியத்தின் அறிவிப்பால் தேர்வர்களுக்கு ஏமாற்றமே எஞ்சியது.

ஆகவே, கடந்த 2012-க்குப் பிறகு உதவிப் பேராசிரியர்களைத் தேர்வு செய்யும் அறிவிப்புகள் முழுமை அடையவில்லை. இதற்கு தகுதித் தேர்வு நடத்துவதில் உள்ள தொய்வுதான் காரணம்.