உரிமையைக் கேட்கிறோம்: கனிமொழி

தொகுதி மறுசீரமைப்பு விவகாரத்தில் தமிழகத்தின் உரிமையையே கேட்கிறோம் என்று நாடாளுமன்ற திமுக குழு தலைவர் கனிமொழி கூறினார்.

சென்னை, மார்ச் 22: தொகுதி மறுசீரமைப்பு விவகாரத்தில் தமிழகத்தின் உரிமையையே கேட்கிறோம் என்று நாடாளுமன்ற திமுக குழு தலைவர் கனிமொழி கூறினார்.

தொகுதி மறுசீரமைப்பு விவகாரம் தொடர்பான கூட்டத்துக்குப் பிறகு அவர் செய்தியாளர்களிடம் கூறியதாவது: முதல்வர் கூட்டிய கூட்டுக்குழுக்கூட்டம் இந்திய அரசியலில் வரலாற்று முக்கியத்துவம் பெற்றுள்ளது. இதற்கு நாடு முழுவதும் மிகுந்த வரவேற்பு கிடைத்துள்ளது. தொகுதி மறுசீரமைப்பு நியாயமாக நடைபெற வேண்டும் என்று கூட்டத்தில் பங்கேற்ற அனைவரும் வலியுறுத்தினர்.

கடந்த முறை 25 ஆண்டுகளுக்கு தொகுதி மறுசீரமைப்பு ஒத்திவைக்கப்பட்டது. அதே அடிப்படையில்தான் இப்போதும் 25 ஆண்டுகளுக்கு ஒத்திவைக்க வேண்டும் என்று வலியுறுத்தப்பட்டது. அழைப்பு விடுக்கப்பட்ட அனைவரும் கூட்டத்தில் பங்கேற்றனர். திரிணமூல் காங்கிரஸ் மட்டும் வரமுடியாத சூழல். ஆந்திரத்தின் ஜெகன் மோகன் ரெட்டி கட்சியிலிருந்து பிரதிநிதி வருவதாக இருந்தது. அதேநேரம் முதல்வர் ஸ்டாலின் கருத்தோடு உடன்படுவதாக ஜெகன்மோகன் ரெட்டி தனது கருத்தை வெளிப்படுத்தினார்.