പ്രതീക്ഷ അസ്ഥാനത്തല്ല; വിഴിഞ്ഞം കുതിക്കുന്നു

രണ്ടു മാസത്തിനിടയിൽ 25,000 കണ്ടെയ്നറുകൾ

- ബി. വി. അരുൺകുമാർ

തിരുവനന്തപുരം: സംസ്ഥാനത്തിന്റെ സ്വപ്നപദ്ധതിയായ വിഴിഞ്ഞം അന്താ രാഷ്ട്ര തുറമുഖത്ത് ട്രയൽ റൺ ആരംഭിച്ച് രണ്ടു മാസത്തിനിടയിൽ 25,000 കണ്ടയ് നറുകൾ (ടിഇയും ഇരുപത് അടി തുല്യമായ യൂണിറ്റുകൾ) കൈകാര്യം ചെയ്തു.

ഈവർഷം ജൂലൈ 11നാണ് വിഴിഞ്ഞത്ത് ആദ്യ കണ്ടെയ്നർ കപ്പൽ തീരമണഞ്ഞത്. ചൈനയിൽ നിന്നുള്ള സാൻ ഫെർണാണ്ടോ എന്ന കപ്പലാണ് തീരത്തെത്തിയത്. ഈ സാമ്പത്തിക വർഷം 60,000 കണ്ടെയ്നറുകൾ (ടിഇയു) കൈകാര്യം ചെയ്യാനാകുമെന്നാണ് തുറമുഖ അധികൃതരുടെ പ്രതീക്ഷ.

ഈ വർഷം തന്നെ വിഴിഞ്ഞം തുറമുഖം പൂർണമായും കമ്മിഷൻ ചെയ്യാനാണ് സർക്കാർ ലക്ഷ്യമിടുന്നത്. അന്താരാഷ്ട്ര കപ്പൽ പാത വിഴിഞ്ഞം തുറമുഖത്തിന് സമീപമാണെന്നതാണ് ഏറ്റവും വലിയ പ്രത്യേകത. മാത്രമല്ല സ്വാഭാവിക ആഴവും വിഴിഞ്ഞത്തിന്റെ പ്രാധാന്യത്തെ വർദ്ധിപ്പിക്കുന്നു. അതുകൊണ്ടുതന്നെ കൂറ്റൻ കപ്പലുകൾക്ക് മറ്റു തുറമുഖങ്ങളെക്കാൾ എളുപ്പം വിഴിഞ്ഞത്തെ ആശ്രയി ക്കാനാകും. ഇതിലൂടെ സംസ്ഥാനത്തെ വ്യവസായ മേഖലയിലും വികസനമുണ്ടാകുമെന്ന് സർക്കാർ കരുതുന്നു. വലിയ കണ്ടെയ്നർ ഷിപ്പുകൾക്ക് വിഴിഞ്ഞത്ത് അടുക്കാനാകും. കൊളംബോ, സിംഗപ്പൂർ തുടങ്ങിയ കൂറ്റൻ തുറമുഖങ്ങളുമായാണ് വിഴിഞ്ഞം മത്സരിക്കുന്നത്. ദക്ഷിണേന്ത്യയിലെ ട്രാൻസ്ഷിപ്പ്മെന്റ് ഹബ്ബായി വിഴിഞ്ഞം മാറുമെന്നതിൽ തർക്കമില്ല. നിരവധി വെല്ലുവിളികളെ അതിജീവിച്ചാണ് വിഴിഞ്ഞം അന്താരാഷ്ട്ര തുറമുഖം കമ്മിഷനിംഗ് ഘട്ടത്തിലേക്കെത്തിയത്.