நீட் விவகாரம்: கடும் அமளியால் மக்களவை ஒத்திவைப்பு

மருத்துவ படிப்புக்கு தகுதியான மாணவர்களை தேர்வு செய்வதற்கு நடத்தப்படும் நுழைவுத் தேர்வான நீட் தேர்வு கடந்த மாதம் 5ந்தேதி நடந்தது.

நாடு முழுவதும் சுமார் 24 லட்சம் பேர் இந்த தேர்வை எழுதினார்கள். கடந்த 4ந்தேதி நீட் முடிவுகள் தேர்வு வெளியிடப்பட்டன. அதன் பிறகு சில மாணவர்களுக்கு கருணை மதிப்பெண்கள் வழங்கப்பட்டதால் சர்ச்சை வெடித்தது.

இந்த நிலையில் நீட் தேர்வில் பீகார், ராஜஸ்தான், மகாராஷ்டிரா, குஜராத், உத்தரபிரதேசம் உள்பட பல மாநிலங்களில் முறைகேடுகள் நடந்து இருப்பது கண்டு பிடிக்கப்பட்டது. பல லட்சம் ரூபாய்க்கு வினாத்தாள்கள் விற்பனை ஆகி இருப்பதும் தெரியவந்தது.

இதையடுத்து நீட் தேர்வு முறைகேடுகள் குறித்து சி.பி.ஐ.விசாரணை நடத்த மத்திய அரசு உத்தரவிட்டது. அதன்பேரில் சி.பி.ஐ. 6 வழக்குகள் பதிவு செய்து விசாரணை நடத்தி வருகிறது.

வினாத்தாள்களை கசிய விட்டதாக நேற்று 2 பேரை பீகாரில் சி.பி.ஐ.அதிகாரிகள் கைது செய்தனர்.

நீட் தேர்வு விவகாரத்தில் தேசிய தேர்வு முகமை மீது அடுத்தடுத்து குற்றச்சாட்டுகள் எழுந்துள்ளதால் நீட் தேர்வு எழுதிய மாணவர்கள் கடும் அதிர்ச்சி அடைந்துள்ளனர்.