காமராஜர் கல்வீடு கட்டும் திட்ட மானியம் ரூ. 5 லட்சமாக உயர்வு - முதலமைச்சர் ரங்கசாமி அறிவிப்பு

புதுச்சேரி சட்டப் பேரவையில் மானிய கோரிக்கைகள் மீதான விவாதத்திற்கு முதலமைச்சர் ரங்கசாமி பதில் அளித்தார்.

அப்போது அவர் பேசியதாவது, பட்ஜெட் மானிய கோரிக்கைகள் மீது அனைத்து சட்டமன்ற உறுப்பினர்களும் மாநில வளர்ச்சிக்கு தங்கள் கருத்துக்களை தெரிவித்துள்ளனர். அமைச்சர்களும் தெளிவான பதில்களை கூறியுள்ளனர். அனைத்து கோரிக்கைகளும் நிறைவேற்றித் தர வேண்டும் என்பது அரசின் எண்ணம்.

குடிசை மாற்று வாரியத்தின் மூலம் காமராஜர் கல் வீடு கட்டும் திட்டம் சிறப்பாக செயல்படுத்தப்பட்டு வந்தது. இடையிலே தடை பட்டிருந்தாலும் மீண்டும் அந்தத் திட்டத்தை சிறப்பாக செயல்படுத்த வேண்டும் என்பது அரசின் எண்ணம். கல் வீடு கட்டும் திட்டத்தின் மூலம் வழங்கப்படும் நிதி ரூ. 5 லட்சமாக உயர்த்தி வழங்கப்படும்.

அதேபோன்று பிரதமர் வீடு கட்டும் திட்டத்திலும் மத்திய அரசு வழங்கும் ரூ. 2.25 லட்சம் நிதியுடன், மாநில அரசு நிதியை சேர்த்து அதற்கும் ரூ. 5 லட்சம் கொடுக்கப்படும். மத்திய அரசு அளிக்கும் நிதியையும் பயன்படுத்திக் கொள்ள வேண்டும், மாநில அரசின் நிதியின் மூலமாகவும் கல் வீடு கட்டும் திட்டத்தை சிறப்பாக செயல்படுத்த வேண்டும் என்பது அரசின் எண்ணம். சட்டமன்றத்தை கட்ட வேண்டும் என்ற எண்ணத்தை அனைத்து எம்.எல்.ஏ.க்களும் சபையில் வெளிப்படுத்தியுள்ளனர்.