அனைத்து துறைகளிலும் பெண்கள் சிறப்பாக செயல்பட்டு வருகிறார்கள்-புதுச்சேரி கவர்னர் பேச்சு

காரைக்கால், நவ. 22-காரைக்காலில் நேற்று நடைபெற்ற மகளிர் மாநாட்டில், புதுச்சேரி கவர்னர் பேசியதாவது, சட்டப்பேரவை தலைவர், அமைச்சர் பெருமக்கள், காரைக்கால் மாவட்ட ஆட்சியர், மற்றும் இந்த மாநாட்டில் பங்கேற்று இருக்கும் பெண்கள் "நாரி சக்தி" அனைவருக்கும் முதற்கண் என்னுடைய வணக்கத்தை தெரிவித்துக் கொள்கிறேன். b

இறைவனுக்கு தொண்டு செய்ததால், இறைவனே "அம்மையே" என்று அழைத்த காரைக்கால் அம்மையார் பிறந்து வாழ்ந்த மண்ணில் இந்த "காரைக்கால் மகளிர் மாநாடு" நடப்பது எனக்கு மிகுந்த மகிழ்ச்சியைத் தருகிறது. மகாகவி பாரதியார் நினைத்ததைப் போல, தொழில், அறிவியல், மருத்துவம், சட்டம், காவல், விளையாட்டு, அரசியல் என்று எல்லா துறைகளிலும் இன்று பெண்கள் சாதனை படைத்து வருவதை நாம் பார்க்கிறோம். மகளிர் சுய உதவிக் குழுக்கள் தொடங்கி அதன் மூலமாக கைத்தொழில் செய்து பொருளாதார பலம் பெற்று இருக்கிறார்கள். அது மட்டுமல்லாமல், பெண்கள், தொழில் அதிபர்களாக உயர்ந்து பலருக்கு வேலை கொடுத்து அவர்களுடைய வாழ்க்கையை முன்னேற்றுவதையும் பார்க்க முடிகிறது.

சுய உதவிக் குழுக்கள் தொடங்கி ஊரக வளர்ச்சிக்குப் பாடுபட்டு, காலம் சென்ற பாரதப் பிரதமர் வாஜ்பாயால் "ஸ்ரீ சக்தி" விருது பெற்ற சின்னப்பிள்ளை போன்ற பலரை இதற்கு உதாரணமாக சொல்லலாம். விருது வழங்கிய பாரதப் பிரதமர் தன்னைவிட வயதில் குறைந்த சின்னப்பிள்ளையின் காலில் விழுந்து ஆசி பெற்றதை கண்டு இந்த நாடே வியந்தது.

ஆண்களுக்கு இருக்கும் எல்லா திறமைகளும் பெண்களுக்கும் உண்டு என்பதற்கு ஏற்ப இந்திய பாதுகாப்புத் துறையிலும் காவல் துறையிலும் பெண்கள் பல உயர் பதவிகளில் இருந்து சாதனை செய்து வருகிறார்கள்.