சிறுபான்மையினர் ஆணைய கலந்தாய்வுக் கூட்டம்

தமிழ்நாடு மாநில சிறுபான்மையினர் ஆணையத்தின் கலந்தாய்வுக் கூட்டம் மாநில சிறுபான்மையினர் ஆணையத்தின் தலைவர் அருட்தந்தை சொ. ஜோ அருண் தலைமையில், மாவட்ட ஆட்சித்தலைவர் ராஜகோபால் சுன்கரா முன்னிலையில் நடைபெற்றது.

ஈரோடு மாவட்ட ஆட்சித்தலைவர் அலுவலக கூட்டரங்கில் சிறுபான்மையினர் நலத்துறையின் மூலம் தமிழ்நாடு அரசின் சார்பில் செயல்படுத்தப்படும் திட்டங்கள் குறித்த கலந்தாய்வுக் கூட்டம் மாநில சிறுபான்மையினர் ஆணையத்தின் தலைவர் அருட்தந்தை சொ. ஜோ அருண் தலைமையில், மாவட்ட ஆட்சித்தலைவர் ராஜகோபால் சுன்கரா மற்றும் மாநில சிறுபான்மையினர் ஆணையத்தின் உறுப்பினர்கள் துணைத் தலைவர் அப்துல் குத்தூஸ் (எ) இறையன்பன் குத்தூஸ், சுவர்ணராஜ், பிரவீன்குமார் டாட்டியா, ராஜேந்திர பிரசாத், ரமீத் கபூர், முகமது ரஃபி ஆகியோர் முன்னிலையில் நடைபெற்றது.

மாநில சிறுபான்மையினர் ஆணையத்தின் தலைவர் செய்தியாளர்களிடம் தெரிவித்ததாவது, தமிழ்நாடு முதலமைச்சர் வழிகாட்டுதலின்படி தமிழ்நாடு மாநில சிறுபான்மையினர் ஆணையம் சிறப்பாக செயல்பட்டு வருகிறது.

சிறுபான்மையினர் மக்களுக்கு தேவையான திட்டங்களையும், அவர்களின் உரிமைகள் மற்றும் வாழ்வியல் பாதுகாப்புக்கு தேவையான அனைத்து நடவடிக்கைகளையும் தமிழ்நாடு முதலமைச்சர் தலைமையிலான அரசு சிறப்பாக மேற்கொண்டு வருகிறது. தமிழ்மொழி அல்லாமல் பிற மொழியை தாய்மொழியாக கொண்டு தமிழ்நாட்டில் வாழும் சிறுபான்மையினர்களுக்கு தேவையான அனைத்து வசதிகளும், திட்டங்களும் அரசியலமைப்பு திட்டத்தின்படி, தமிழ்நாடு சிறுபான்மையினர் நலத்துறையின் மூலம் செய்து தரப்படுகிறது. இதுவரை ஆய்வு மேற்கொள்ளப்பட்ட 13 மாவட்டங்களிலிருந்து சிறுபான்மையினரிடமிருந்து பெறப்பட்ட 489 கோரிக்கை மனுக்களில் 302 மனுக்களுக்கு தீர்வு காணப்பட்டுள்ளது.

இன்றைய தினம் 14வது மாவட்டமாக ஈரோடு மாவட்டத்தில் கலந்தாய்வுக் கூட்டம் நடத்தப்படுகிறது.

மேலும், கூட்டங்களிலேயே 70 முதல் 80 சதவீத மனுக்களுக்கு தீர்வு காணப்படுகிறது. எனவே, மாவட்ட ஆட்சித்தலைவர் மற்றும் மாவட்ட கண்காணிப்பாளர், காவல் அதிகாரிகள் உடனடியாக இணைந்து பணிகள் மேற்கொள்ளப்பட்டு வருகிறது.