જયસુખ પટેલના જામીન રદ હાઈકોર્ટે કહ્યું, કાળજી રાખી હોત તો લોકોના જીવ બચી જાત

પુલની હાલતથી સારી રીતે વાકેફ હોવા છતા જયસુખે તેને ચાલુ કરાવતા135 લોકોએ જીવ ગૂમાવવાનો વારો આવ્યો બિઝનેસમેન હોવાથી ક્યાંય ભાગી જવાની શક્યતા ન હોવાથી જામીન આપવાની સરકારની રજૂઆત પણ હાઇકોર્ટે ગ્રાહ્ય ન રાખી

મોરબીના ઐતિહાસિક ઝુલતા પુલના દૂર્ભાગ્યપૂર્ણ અકસ્માતમાં ૧૩૫ નિર્દોષ લોકોએ જીવ ગૂમાવ્યાના ગુનામાં ઓરેવા ગ્રૂપના મેનેજીંગ ડિરેક્ટર જયસુખ પટેલને જામીન આપવાનો હાઇકોર્ટે ધરાર ઇનકાર કર્યો છે. જસ્ટિસ દિવ્યેશ જોષીએ વિસ્તૃત ચુકાદો આપતાં ઠરાવ્યું છે કે, ‘આરોપી(જયસુખ પટેલ) ને ઝુલતા પુલની જર્જરિત હાલત વિશે શરૂઆતથી જ જાણ હતી અને તેમ છતાંય તેને ચાલુ કરવાની મંજૂરી આપી હતી. તેમણે પુલનું યોગ્ય મેઇન્ટેનન્સ અને રાખરખાવ કરવાનો સમયસર નિર્ણય નહીં લેતાં આ કમનસીબ દુર્ઘટના બની હતી અને એમાં નિર્દોષ લોકોએ કિંમતી જીવન ગુમાવ્યું હતું. જો તેમણે પુલ સંદર્ભે નિર્ણય લીધો હોત તો કિંમતી માનવ જીવ બચી શક્યા હોત. ગુનાની ગંભીરતા, સજાની જોગવાઇ અને આરોપી ખુદ સમાજના પ્રતિષ્ઠિત બિઝનેસમેન હોવાના મામલે સેશન્સ કોર્ટમાં મામલો પેન્ડિંગ છે, ત્યારે હાલના તબક્કે તેમની જામીન રદ કરવામાં આવે છે.’