അറബിക്കടൽ സാക്ഷി; വിക്രാന്ത് നാടിന് സ്വന്തം

വിക്രാന്ത് ഓരോ ഇന്ത്യക്കാരന്റെയും വികാരം പ്രധാനമന്ത്രി

കൊച്ചി: പോരാട്ടങ്ങളുടെയും പ്രതിരോധത്തിന്റെയും ഓർമകൾ തിരതല്ലുന്ന അറബിക്കടലിനെ സാക്ഷിയാക്കി രാജ്യം പുതിയ ചരിത്രമെഴുതി. ഇന്ത്യ ആദ്യമായി തദ്ദേശീയമായി നിർമിച്ച വിമാനവാഹിനി കപ്പൽ ഐ.എൻ.എസ് വിക്രാന്ത് കൊച്ചി കപ്പൽശാലയിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി രാജ്യത്തിനും നാവിക സേനക്കും സമർപ്പിച്ചു. കരയിലും ആകാശത്തും മാത്രമല്ല, ഇനി കടലിലും പ്രതിരോധത്തിൽ മുൻനിര ശക്തികളോട് കിടപിടിക്കാനുള്ള കരുത്ത് ഇന്ത്യക്കുണ്ടെന്ന് ലോകത്തോട് വിളിച്ചുപറഞ്ഞ ദിവസം കൂടിയായിരുന്നു വെള്ളിയാഴ്ച.