ഓർമകൾക്കെന്തു സുഗന്ധം

കുട്ടിക്കാലത്തെയും ഷൂട്ടിങ് സ്ഥലത്തെയും ചാനലുകളിലെയും വിദേശത്തെയും ഓണം ഓർമകളുമായി നടി സ്വാസിക വിജയ്

- സിദ്ദീഖ് പെരിന്തൽമണ്ണ

കുട്ടിക്കാലത്തെ നല്ലോണം

ഓണത്തിന്റെ നല്ലോർമകൾ തെളിഞ്ഞുനിൽക്കുന്നത് കുട്ടിക്കാലത്തായിരുന്നു. ചെറുപ്പത്തിലെ ഓണമായിരുന്നു ശരിക്കും ആഘോഷം. അച്ഛന് ജോലി ഡൽഹിയിലായിരുന്നപ്പോൾ കുറച്ചു നാൾ ഞങ്ങളും അവിടെയായിരുന്നു താമസം. അച്ഛൻ വിദേശത്തുപോയപ്പോൾ ഞാനും അമ്മയും അനിയനും നാട്ടിൽ വന്ന് താമസമാക്കി. ഞാൻ അന്ന് നാലാം ക്ലാസിൽ പഠിക്കുകയായിരുന്നു. ആ സമയത്ത് നടത്തിയ ഓണാഘോഷമായിരുന്നു ശരിക്കും ആസ്വദിച്ച് ആഘോഷിച്ച ഓണം. പത്തു ദിവസം ചാണകം മെഴുകിയ നിലത്ത് തുമ്പപ്പൂ, മുക്കുറ്റിപ്പൂ ഒക്കെ കൊണ്ട് അമ്മൂമ്മയുടെ കൂടെയിരുന്ന് പൂക്കളമിടും. അപ്പൂപ്പൻ മണ്ണുകൊണ്ട് ഓണത്തപ്പനെ ഉണ്ടാക്കിവെക്കും. ഡൽഹി താമസകാലത്ത് അതൊന്നും കാണാൻ കഴിഞ്ഞിട്ടില്ല. ഓണക്കോടിയായി പട്ടുപാവാടയും ബ്ലൗസും തരുമായിരുന്നു. അന്നത്തെ ഓണാഘോഷങ്ങൾക്കും ഓണക്കോടികൾക്കും ഭംഗിയേറെയായിരുന്നു.