മൂന്നിലും മുങ്ങി മഞ്ഞപ്പട

കേരള ബ്ലാസ്റ്റേഴ്സിന് തുടർച്ചയായ മൂന്നാം തോൽവി; മുംബൈ സിറ്റിയോട് തോറ്റത് 2-0ത്തിന്

കൊച്ചി: സ്വന്തം തട്ടകത്തിൽ വിജയം നേടി ആരാധകരെ ആശ്വസിപ്പിക്കാമെന്ന കേരള ബ്ലാസ്റ്റേഴ്സിന്റെ കണക്കുകൂട്ടൽ തെറ്റി. പകരം ആരാധകർക്ക് മഞ്ഞപ്പട സമ്മാനിച്ചത് വീണ്ടുമൊരു തോൽവി. കൊച്ചി ജവഹർലാൽ നെഹ്റു സ്റ്റേഡിയത്തിൽ കരുത്തരായ മുംബൈ സിറ്റി എഫ്.സി2-0ത്തിനാണ് കൊമ്പന്മാരെ കൊമ്പുകുത്തിച്ചത്.

ലീഗിൽ ബ്ലാസ്റ്റേഴ്സിന്റെ തുടർച്ചയായ മൂന്നാം തോൽവിയാണിത്. ഒന്നാം പകുതിയിലായിരുന്നു രണ്ടു ഗോളുകളും. മെഹ്താബ് സിങ് (21), മുൻ ബ്ലാസ്റ്റേഴ്സ് താരം ജോർജെ പെരേര ഡയസ് (31) എന്നിവർ വലകുലുക്കി. മത്സരത്തിലുടനീളം പന്തടക്കത്തിലും ആക്രമണ ഫുട്ബാളിലും മുംബൈ തന്നെയായിരുന്നു മുന്നിൽ.