குறைந்த நாட்களே நடைபெற வாய்ப்பு: டிசம்பர்9-ஆம்தேதி சட்டசபை கூடுகிறது.

தமிழக சட்டசபை டிசம்பர் 9-ஆம் தேதி கூடுகிறது.

இதற்கான அறிவிப்பை சபாநாயகர் அப்பாவு இன்று வெளியிட்டார். இந்தக் கூட்டம் குறைந்த நாட்களே நடைபெறும் எனத் தெரிகிறது. இதற்கிடையே கூட்டம் எத்தனை நாட்கள் நடைபெறும் என்பது குறித்து அலுவல் ஆய்வுக் குழுவில் முடிவு செய்யப்படுகிறது.

தமிழக சட்டசபை ஆண்டுதோறும் தொடக்கத்தில் ஒரு முறை கூடும். அப்போது ஆளுநர் உரை நிகழ்த்துவது வழக்கம். பின்னர் பட்ஜெட் தாக்கல் செய்வதற்காக கூட்டம் நடக்கும். அதன் பிறகு பட்ஜெட் மானிய கோரிக்கை மீதான விவாதம் நடக்கும். அப்போது நீண்ட நாள் கூட்டத் தொடர் இடம் பெறும். இதைத் தவிர சில நேரங்களில் சட்டசபையின் அவசர கூட்டமும் நடத்தப்படுவது உண்டு.

2024-ஆம் ஆண்டு தொடங்கிய பிறகு சட்டசபையின் முதல் கூட்டம் கடந்த பிப்ரவரி மாதம் 12-ஆம் தேதி தொடங்கியது. ஆளுநர் ஆர்.என். ரவி உரை நிகழ்த்தினார். இந்த கூட்டம் பிப்ரவரி 15-ஆம் தேதி வரை நிறைவடைந்தது. அன்றைய தினம் முதலமைச்சர் மு.க. ஸ்டாலின் பதிலுரை நிகழ்த்தினார்.