ஜார்க்கண்ட் முதல்வராக ஹேமந்த் சோரன் இன்று மாலை பதவியேற்பு!

விழாவில் ராகுல், உதயநிதி ஸ்டாலின், தலைவர்கள் பங்கேற்கின்றனர்!!

ஜார்க்கண்ட் சட்ட மன்ற தேர்தலில் இந்தியா கூட்டணி வெற்றி பெற்று ஆட்சியைப் பிடித்தது. இதைத் தொடர்ந்து ஜார்க்கண்ட் மாநில முதல்வராக ஜார்கண்ட் முக்தி மோர்ச்சா கட்சியின் தலைவர் ஹேமந்த் சோரன் இன்று மாலை பதவியேற்க உள்ளார்.

ராஞ்சியில் நடைபெறும் பதவியேற்பு விழாவில் ஆளுநர் அவருக்கு பதவிப்பிரமாணம் செய்து வைக்கிறார். இந்த விழாவில் ராகுல், கார்கே, மம்தா, அகிலேஷ் யாதவ் உள்ளிட்ட இந்தியா கூட்டணி தலைவர்கள் கலந்து கொள்கின்றனர்.

ஜார்க்கண்ட் முதல்வராக ஹேமந்த் சோரன் 4வது முறையாக பதவியேற்பது குறிப்பிடத்தக்கது. கடந்த 2000ஆம் ஆண்டு நவ.15ஆம் தேதி பீகார் மாநிலத்திலிருந்து பிரிக்கப்பட்டு ஜார்கண்ட் தனிமாநிலமாக உருவானது. ஜார்க்கண்டில் உள்ள 81 சட்டமன்ற தொகுதிகளுக்கும் கடந்த நவ.13 மற்றும் 20ஆம் தேதிகளில் இரண்டு கட்டமாக தேர்தல் நடைபெற்றது.

இந்த தேர்தலில் ஜார்க்கண்ட் முக்தி மோர்ச்சா தலைமையிலான இந்தியா கூட்டணி வெற்றி பெற்று ஆட்சியைப் பிடித்தது. ஜார்க்கண்ட் மாநிலத்தை கைப்பற்ற நினைத்த பா.ஜ.க.வுக்கு ஏமாற்றமே மிஞ்சியது. இந்த தேர்தலில் இந்தியா கூட்டணி 56 இடங்களிலும், பா.ஜ.க. கூட்டணி 24 இடங்களிலும் வெற்றி பெற்றது. இந்தியா கூட்டணியில் ஜார்க்கண்ட் முக்தி மோர்ச்சா 34 இடங்களிலும், காங்கிரஸ் 16 இடங்களிலும், ராஷ்டிரிய ஜனதா தளம் 4 இடங்களிலும், மார்க்சிஸ்ட் லெனினிஸ்ட் 2 இடங்களிலும் வெற்றி பெற்றன. பர் ஹைட் தொகுதியில் போட்டியிட்ட முதல்வர் ஹேமந்த் சோரன் 39 ஆயிரத்து 791 வாக்குகள் வித்தியாசத்தில் வெற்றி பெற்றார்.